کورونا جے این ون ویئرینٹ نا داتم اسکان بیرہ 15 کیس رپورٹ مسنے، ڈاکٹر ندیم جان

اسلام آباد۔ 16 جنوری (اے پی پی) نگران بنجائی وزیر قومی وزارت جان جوڑی ڈاکٹر ندیم جان پارینے کہ کورونا جے این ون ویرینٹ نا داتم اسکان بیرہ 15 کیس رپورٹ مسنے، این آئی ایچ لیب 8 آغاخان یونیورسٹی 5 ڈاؤ ہیلتھ یونیورسٹی کراچی 2 کیس رپورٹ کرینے۔ سے شنبےنادے آوزارت جان جوڑی آن جاری بیان نا رداٹ ڈاکٹر ندیم جان پارےکہ وزارت کورونا نا پوسکن آ ویرینٹ نا خصوصی وڑاٹ چاروکی ءِ کننگ اٹی ءِ۔ ترجمان قومی وزارت جان جوڑی نا کنڈآن جاری بیان اٹی اوپارے کہ پوسکن آ ویرینٹ آن الس ءِ رکھ تخنگ کن غٹ تر المی گام گیج آتے پک کننگ انگ ءِ۔ ڈاکٹر ندیم جان پارے کہ بنجاصوبہ غاتون پورو رابطہ ٹی ءِ۔ اوپارے کہ کورونا نا دا ویریئنٹ  داتم اسکان دنیا ٹی 60 آن زیات ملک آتیٹی رپورٹ مسنے۔ ڈبلیو ایچ او نا رداٹ دا ویرینٹ نا تالانی نا رسک بھاز کم ءِ ۔ قومی ادارہ جان جوڑی وزیر جان جوڑی نا پارت آتیا موسمی معمول نا رداٹ خرہ ٹٹ نا توننگ و کنٹرول کننگ کن اسہ ایڈوائزری اس جاری کرینے۔ یخ آتا تُو تیٹی خرہ ٹٹ نا تالانی نا رسک معمولی وڑاٹ ودک۔ ڈاکٹر ندیم جان پارے کہ پاکستان اٹی دا مرض انا بھلو کچ  اسے آ تالانی نا گمان کم ءِ۔ اوپارےکہ دا ایڈوائزری نا مسخت جان جوڑی نا ادارہ غاتے رکھی و کنٹرول نا گام گیج آتا بارواٹی معلومدار کننگ ءِ۔ اومستی پارے کہ حفظان صحت نا سادہ وڑہم دانا تالانی ءِ توننگ اٹ اہم ءُ کڑد اس ادا کیک۔