شارتا ویل آتا ایسری ٹی شاری تا کڑد المی ءِ، مرتضیٰ سولنگی

اسلام آباد۔ 16 جنوری (اے پی پی) نگران بنجائی وزیر حوالکاری، شینکاری و پارلیمانی امور مرتضیٰ سولنگی پارینے کہ شار تا ویل آتا ایسری ٹی شری تا کڑد المی ءِ، ہندی حکومت آک مچ آ ملک اٹی ہندی کہول آ بدلی نا اصلی محرک ءُ، کانود نا رداٹ ہر صوبہ ٹی ہندی حکومت آتا جوڑ کننگ المی ءِ، ہندی حکومت آتیان بیدس شیفکو کہول آ ویل آتا ایسری ممکن اف۔ داہیت ءِ او سے شنبے نادے آداڑے اِرادے ئی کانفرنس سِوک ہیکاتھون’’ویل آتا شناخت‘‘ نا بنائی دود آن تران کرسا پارے۔ نگران بنجائی وزیر حوالکاری کانفرنس نا بنائی سیشن اٹی بشخ ہلنگ آ خوشی نا درشانی ءِ کرسا پارے کہ کانفرنس ملک انا اہم انگا شاری ویل آتا اجتماعی وڑاٹ پیدواری ءِ کننگ کن سرکاری و نجی بشخ انا ماہرین و سول سوسائٹی ءِ اسہ پلیٹ فارم اس تننگ ءِ۔ اوپارے کہ کانفرنس نا بنداوی مسخت داویل آتیکن ڈیجیٹل ایسر اس تیار کننگ نا کوشست ءِ۔ نگران بنجائی وزیر حوالکاری پارے کہ پاکستان اٹی جدت نا حامل ہندی ایسر تیار کننگ آ چکار کننگ نا بھا ز لائخی ارے ولے سرکاری بشخ انا کنڈآن گیشتر ویل آتا شناخت ءِ تنیا کننگک۔ اوپارے کہ کنے یقین ءِ کہ ویل آتا ایسری نا بابت داکانفرنس و اوکان پد سوک  ہیکاتھون نا اڈتننگ زیات پائیدار نتیجہ اس فراوان کیک۔ بنجائی وزیر حوالکاری پارے کہ حکومت پاکستان وسیلہ غاتا گچین بشخنگ ءِ پک کننگ کن شاہدی تیا تالان فیصلہ سازی نا کلچر نا ودوک آ گرج ءِ امنا کیک۔ کنے یقین ءِ کہ بالآخر دا عمل السی خذمت آتا فراوانی ءِ گچین کننگ، ڈیجیٹل ، ڈیجیٹل تقسیم ءِ چٹفنگ و ہندی حکومت آتے سوگو کننگ اٹ کمک فراوان کیک۔