نگران وزیرخارجہ غیروابستہ ملک آتاتحریک نادیوان و ساؤتھ سمٹ اٹی بشخ ہلنگ کن 16 آن 22 جنوری یوگنڈانا دورہ غا مریک، دفترخارجہ

اسلام آباد۔ 16 جنوری (اے پی پی) نگران وزیرخارجہ جلیل عباس جیلانی 16آن 22 جنوری 2024اسکان یوگنڈا نادارالحکومت کمپالانا دورہءِ کننگ ءِ ہراڑے او 17 آن 20 جنوری 2024اسکان غیروابستہ ملک آتا تحریک نا سروک مملکت و حکومت نا 19 می دیوان و 21 و 22 جنوری آ مسٹ میکو ساؤتھ سمٹ اٹی 21 بشخ ہلیرہ۔ دفترخارجہ غان جاری بیان نا رداٹ ہڑتوم آ سروکی دیوان باسک آتیکن جہانی، علاقائی، سیاسی و راجی اقتصادی ویل آتیا اسیجائی موقف آ سجفنگ و دادے تالان کننگ ناموقع  فراوان کیک۔ متکن آ باسک انا وڑاٹ پاکستان غیروابستہ تحریک نا ایجنڈا نا جوڑ کننگ اٹ کڑد ادا کرینے و امن و سلامتی نا بابت علاقائی وجہانی چیلنج آتون مون تننگ اٹ ’’این اے ایم‘‘ نا کڑد ءِ پین سوگو کننگ کن سنبرینگوک ءِ۔ ہنداوڑ پاکستان گروپ 77 و چین نا اسہ فعال باسک اس مسنے و پائیدار شونداری ، نیزگاری نا چٹفنگ و چاگڑدی بدلی تتون اوار ’’گلوبل ساؤتھ‘‘ نا نیام اٹ کمکاری ءِ بڑزکو اولیت ایتک۔ غیر وابستہ ملک آتا تحریک نا سروکی دیوان اٹی، وزیرخارجہ جہانی امن ، سلامتی و شونداری نا بابت ہندی و ساڑی آ دور جہانی چیلنج آتیا پاکستان نا نقطہ نظر ءِ پیش کیک۔ او کثیر الجہتی ءِ سوگو کننگ و اقوام متحدہ نا چارٹر نا مسخت و اصول آتے مون آ دننگ کن ’’این اے ایم ‘‘ نا کڑد ءِ سوگوی تننگ نا گرج آ زور شاغک۔ ساؤتھ سمٹ اٹی وزیرخارجہ اسیجائی چیلنج آتے مون آتخنگ آن بیدس شونہال و متحدہ جنوب نا ایجنڈا غا امنا کننگ کن ’’گلوبل ساؤتھ‘‘ نا ملک آتا نیام اٹ کمکاری و یکجہتی ءِ ودفنگ آ پاکستان نا وژن ءِ پیش کیک۔ ہڑتوم آ سروکی دیوان تا وخت آ وزیرخارجہ نا ایلو شریک ملک آتا ڈل آتا سروک آتون ہم ہڑتوم آکنڈآتا اوڑدہی ہم گمانی ءِ۔