امریکی نائب وزیر خارجہ رچرڈ راہل نا دورہ ءِ پاکستان بے کچ اہمیت تخک، سینیٹر محمد عبدالقادر

کوئٹہ۔ 15 جنوری (اے پی پی) چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امورنا ماہر سینیٹر محمد عبدالقادر پارینے کہ امریکی نائب وزیرخارجہ رچرڈ راہل نادورہ ءِ پاکستان بے کچ اہمیت تخک  امریکی وزیر خارجہ اوغان باتی تا اوغانستان آ پدی ہِننگ و آبادکاری نا بابت پاکستانی کمامدارآتا لائحہ عمل آن آگاہی دوئی کرے امریکہ پاکستان اٹی رہینگوک 25 ہزار اوغانی تا امریکہ غا گدریفنگ نا بابت پاکستان آن کمک خواہک۔ داڑے جاری مروک اسہ بیان اسے ٹی سینیٹر محمد عبدالقادر پارے کہ امریکی نائب وزیر خارجہ دے ٹک نیامی و سویلی ایشیا نا خصوصی دورہ  نا ایسر آ پاکستان آ بسنے ہراڑے اونا پاکستان نا بڑزکو کمامدارآتون اوڑدہی مس۔ اواوغان تا اوفتا ملک اٹی آبادکاری نا باندات نا جاچ ءِ ہلک اوغان تا اوغانستان اٹی آبادکاری و25 ہزار اوغان تا امریکہ غا گدریفنگ اونا دورہ ٹی نمان اہمیت تخک، ہرااوغانک امریکہ ءِ تینا خذمت آتے تسر امریکہ اوفتے رکھ فراوان کننگ و اوفتے کن آسراتی تا خیال ءِ تخنگ المی تکک ۔ اوپارے کہ پاکستان و امریکہ نا نیام اٹ تعلقداری مدام اہمیت تخوک مسنے امریکی نائب وزیرخارجہ نا ساڑی آ دورہ ءِ پاکستان اٹی اسیجائی فائدہ غاتے پین گچین کننگ و گیشتر شریداری نا بابت ہم است بڈ گپ وتران مس امریکی نائب وزیرخارجہ پاکستان اٹ پاکستانی کمامدارآتون امریکی واپار و زرکاری نا مون آدننگ نا بابت اومیت افزا ہیت کرے۔ چیئرمین قائمہ کمیٹی پارے کہ امریکی نائب وزیرخارجہ نا داپاننگ کہ امریکی پاکستان تون تینا دیرپاکمکاری و مخ تفی ءِ برجاتخک دابابت ہم اونا دورہ ءِ پاکستان بے کچ مثبت ٹک ہلکنے دے ٹک نیامی و سویلی ایشیاء نا خصوصی دورہ نا ایسر آ اوناپاکستان آ بننگ پاکستان کن سیاسی، سفارتی  واقتصادی اعتبار اٹ بے کچ اہمیت تخک ہراتم کہ امریکہ نا پاکستانی ٹی است خواہی ودک و امریکہ ءِ پاکستان نا بھلا کمکاری نا گرج مریک تو اونا انداز زیات دوستانہ و خوشگوار مریک اوغان تا بابت پاکستان نا اہمیت ءِ سمجھسا اوناانداز سیاست و سفارت ہنداوڑ ءُ جھلک پیش کیک۔