اسلام آباد۔ 15 جنوری (اے پی پی) نگران بنجائی وزیر حوالکاری، شینکاری و پارلیمانی امور مرتضیٰ سولنگی پارینے کہ الیکشن کمیشن آف پاکستان پنچ شنبے نادے 8 فروری 2024ء آ گچین کاری تا تینا قول و عزم آ سلوک ءِ، بنجائی و صوبائی نگران حکومت آک دا زمواری ءِ پورو کننگ اٹ الیکشن کمیشن نا ہروڑنا انتظامی، مالی و سیکورٹی گرج آتے پورو کیرہ۔ داہیت ءِ او دوشنبے نادے آ راجی رابطہ نا پلیٹ فارم ‘‘ایکس’’ آ تینا اسہ ٹویٹ اسے ٹی پارے۔ بنجائی وزیر حوالکاری تینا ٹویٹ اٹی سینیٹ آن منظور مروک قرارداد نمبر 562 نا بابت الیکشن کمیشن آف پاکستان نا کنڈآن سینیٹ سیکرٹریٹ ءِ نوشتہ کروک آ چٹھی ءِ ہم شیئرکرے۔ چٹھی ٹی پاننگانے کہ سینیٹ آن منظور کروک قرارداد نا بابت الیکشن کمیشن نا دیوان اٹی گپ وتران مس۔ دیوان اٹی مشاہدہ کننگاکہ الیکشن کمیشن صدر اسلامی جمہوریہ پاکستان نا سلابت اٹ 8 فروری 2024ء آ لس گچین کاری تا اڈتننگ کن تاریخ مقررکرے۔ الیکشن کمیشن امن و ایمنی نا بحالی کن نگران بنجائی و صوبائی حکومت آتے سیکورٹی حالیت آتے گچین کننگ و لس گچین کاری 2024ء نا پرامن اڈتننگ کن ووٹرآتے سازگار چاگڑد فراوان کننگ نا پارت جاری کرینے۔ الیکشن کمیشن لس گچین کاری 2024ء نا اڈتننگ کن غٹ المی بست وبند آتے پورو کرینے۔ الیکشن کمیشن لس گچین کاری 2024ء نا بابت عدالت عظمیٰ ٹی تینا کمٹمنٹ ہم جمع کرفینے۔ ای سی پی پارے کہ مستین اٹ ہم لس گچین کاری و بلدیاتی گچین کاریک یخ انا موسم اٹی مرساکرینو۔ دا حقائق آتے مو ن آتخسا الیکشن کمیشن کن دا ریسہ غا لس گچین کاری 2024ء ءِ ملتوی کننگ مناسب مفک۔
