اسلام آباد۔ 12 جنوری (اے پی پی) بنجائی وزیر خزانہ و محصولات ڈاکٹر شمشاد اخترپارینے کہ چنکا و نیامی درجہ نا کاروبار ءِ مون آ دننگ حکومت نا اولیت آتیٹی اوار ءِ، ایس ایم ایز کن پاکستان نا اولیکو خصوصی کریڈٹ گارنٹی کمپنی نا جوڑ کننگ آن چنکا و نیامی درجہ نا کاروبار کن زرکاری نا وارخواہی تے ودفنگ اٹ کمک رسینگک۔ اوداہیت ءِ جمعہ نادے آ داڑے وزارت خزانہ و کارانداز پاکستان نا نیام اٹ نیشنل کریڈٹ گارنٹی کمپنی لمیٹڈ نا جوڑ کننگ نا بابت شریداری دود آن تران کرساپارے۔ داوخت آ پاکستان اٹ برطانوی ہائی کمشنر، چیئرمین ایس ای پی، سٹیٹ بینک انا عہدیدار و ایلو بڑزکو کمامدارآک ساڑی ئسر۔ این سی جی سی ایل نا جوڑ کننگ آن پاکستان اٹ چنکا و نیامی درجہ نا کاروبار ءِ مالی کمکاری نا فراوانی ٹی کمک رسینگک۔ شریداری نا رداٹ کمپنی فنانس اسکان رسینگ ءِ ودفنگ کن خصوصی کریڈٹ گارنٹی نا آسراتی فراوان کیک۔ وزیرخزانہ تینا تران اٹی پارے کہ داانقلابی گام انا مسخت چنکا و نیامی درجہ نا کاروبار کن زرکاری نا کسر آوار کروئی ءِ۔ اوپارے کہ پاکستان چنکا و نیامی درجہ نا کاروبار نا نجی کریڈٹ اٹی 5.2درسد بشخ ءِ۔ اوپارے کہ کمپنی پاکستان نا 15 لکھ آن زیات ایس ایم ایز و 3.7 ٹریلین روپئی آن زیات مارکیٹ کچ اکن مصنوعات تیار کیک۔ این سی جی سی ایل مالیاتی ادارہ غاتون اواری اٹ مارکیٹ اٹی کریڈٹ نا دستیابی ءِ پک کیک۔ پاکستان اٹ برطانیہ نا ہائی کمشنر جین میریٹ داوخت آ تینا تران اٹی پارے کہ مالیاتی شمولیت نا پروگرام نا رداٹ کمپنی آ 6 ارب روپئی نا زرکاری کننگانے۔ کارانداز نا چیف ایگزیکٹیو آفیسر تینا تران اٹی پارے کہ زرگزرانی شونداری و اقتصادی نمو نا بابت کارانداز تینا کڑد ءِ برجاتخک۔ اوپارے کہ چنکا و نیامی درجہ نا کاروبار نا مون آ دننگ آن ملک اٹی روزگار نا وارخواہی ودک۔
