کوئٹہ۔ 11 جنوری (اے پی پی) چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر پارینے کہ جمہوری نظام حکومت اٹ الس نا وونٹ آتا اولین اہمیت مریک الس نا گیشتری ہرانمائندہ و سیاسی جماعت ءِ اکثریت ایتک او پارلیمان اٹ الس نا نمائندہ جوڑ مریک، جمہوریت نا اصل روح الس نا کڑد ءِ ولے گچین کاری تیٹی چندی سیاسی جماعت آک اسہ ایلوتون سیٹ ایڈجسٹمنٹ کیرہ یعنی فلاں سیٹ کنا و فلاں نا الس نا کنڈآ ہِننگ آن بیدس اِرا جماعت ڈرائینگ روم اٹ تولسا نشست آتا گڈیکو ءِ فیصلہ ءِ کیرہ۔ داڑے جاری مروک اسہ بیان اسے ٹی سینیٹر محمد عبدالقادر پارے کہ لس گچین کاری تیٹی بشخ ہلنگ آن بیدس ڈرائینگ روم اٹی تولسا نشست آتے بشخنگ جمہوریت نا بنداوی پنجر و اصول آتیان چپءِ داوڑوڈول اٹی الس نا وونٹ آتا عمل دخل برائے پن سلک ، ہندا وڑ وونٹ ءِ شرف ایتبو نانعرہ جمہوریت پسندی آخا بلکن بیرہ اسہ سیاسی ڈھکوسلاو جمہوری شعبدہ بازی اس سلک، ہندا سیاسی فنکاری و پری پول رگنگ پاننگک اودے گچین کاری تیان مست دھاندلی پاننگ مریک۔ اوپارے کہ اگہ چندی سیاسی جماعت آک ہندا وڑنا گچین کاری تا راگ ءِ کروئی ءِ تو الس نا خراج آتیان دوئی مروک آ ارب آ روپئی گچین کاری تا پن اٹ اُف کننگ ناانت منطق اسے ، مچ آ قوم انا وخت ءِ برباد کننگ و قومی سرمایہ نا انت تُک اسے ، جمہوریت اٹ الس سادہ وڑاٹ وونٹ بِٹنگ کن بریک و اوفتا وونٹ ءِ حساب کرسا فیصلہ کننگک کہ دیر اس کٹا دیر اس باتس ڈرائینگ روم اٹ تولسا کٹنگ و باتننگ نا بست وبند ءِ کننگ گچین کاری تیان مست دھاندلی اف تو انت اسے، سیٹ ایڈجسٹمنٹ والا ہندا طرز سیاست جمہوریت نا روح آن چپ ءِ ۔ چیئرمین قائمہ کمیٹی پارے کہ سیٹ ایڈجسٹمنٹ دھاندلی نا اسہ ملفوف پن اسے ، سیاسی فنکارآک تینا غیر جمہوری گام ءِ دھاندلی کون آ بدنام زمانہ لوز اٹ رکھ تخنگ کن سیٹ ایڈجسٹمنٹ نا ملفوف لوز تسنے تانکہ رتی بریبر ہم سوچ وتدبر کروک آ بندغ ءِ شائبہ اسکان مف کہ سیاسی فنکارآک اوڑتون امر غیرجمہوری واردات کرینو ۔
