لاہور۔ 11 جنوری (اے پی پی) نگران بنجائی وزیر تعلیم و کسبی تربیت مددعلی سندھی پارینے کہ پاکستان نا شونداری نا اسٹ انگا کسر تعلیم ءِ، ننے تینا چکار ءِ تعلیمی بشخ آ کننگ نا گرج ءِ۔ داخیال آتا درشانی ءِ او بطور مہمان خاص پنچ شنبے نادے آ داڑے ایوان اقبال اٹی لاہور لیڈز یونیورسٹی نا ہفت می کانووکیشن آن تران کرساکرے۔ داوخت آ وائس چانسلر لاہور لیڈز یونیورسٹی ندیم بھٹی، چیئرمین بورڈ آف گورنرز میاں ظہور وٹوتون اوار فیکلٹی باسک و طالب علم آتا بھلو کچ اس ساڑی ئسر۔ کانووکیشن اٹی 1080 مار و مسن طالب علم آتے ڈگری تننگا۔ کانووکیشن آن تران کرسا بنجائی وزیرپارے کہ کنے دانگیا برسا بھاز خوشی مسنے، کانووکیشن اسہ یات گار موقع اس مریک، دادے آ طالب علم آک تینا خواری نا بھرم ءِ دوئی کیرہ۔ اوپارے کہ اللہ تعالیٰ پاکستان ءِ ہرنعمت ءِ تسنے، ورناک ننا میرات ءُ، اومیت ءِ کہ او تینا کسبی زمواری تے جوانی اٹ پورو کیرہ۔ اوپارے کہ داالمی ءِ کہ نن تینا ورناتیٹی خواننگ نا کلچر ءِ مون آ دننگ کن کاریم کین، دا ڑآن اسہ خوانوک ءُ چین اس مون آ ہِننگ کیک ہرا پاکستان ءِ شونہالی نا کنڈآ دننگ اٹ اہم ءُ کڑد اس ادا کننگ کیک۔ اوپارے کہ پاکستان اٹ سرکاری، نجی و مدرسہ غاتیٹی مسہ وڑنا تعلیم تننگ انگ ءِ ، ہرا ملک اٹی مسہ چندی تپہ ودی کننگ ءُ۔ مدد علی سندھی پارےکہ حکومت نا اولیت تعلیم نا آب ءِ گچین کننگ و اسکول آن پیشن چناتے پدی اتنگ ءِ۔ اوپارے کہ لیڈز یونیورسٹی آب اٹ تعلیم فراوان کننگ ءِ ، داوڑنا تعلیمی ادارہ غاتا ملک ءِ سخت گرج ءِ۔ ایسر اٹ مہمان خاص مار و مسڑ طالب علم آتیٹی میڈل و ڈگری بشخا۔
