
اسلام آباد۔ 11 جنوری (اے پی پی) بنجائی سیکرٹری حوالکاری و شینکاری شاہیرہ شاہد 2024نا گچین کاری تا بابت آگاہی فراوان کننگ نا گرج آ زور شاغسا پارینے کہ ملک گچین کاری تا کنڈآ ہِننگ ءِ، مخلوق ءِ ملک انا حالیت آتا بارواٹی معلومداری فراوان کننگ بھاز المی ءِ۔ داہیت ءِ او پنچ شنبےنادے آ داڑے پریس انفارمیشن ڈیپارٹمنٹ نا کنڈآن ہندی ہوٹل اٹی ’’گچین کاری 2024ء: سیاسی جماعت آتا اقتصادی اصلاحات نا ایجنڈا‘‘ نا سرحال آ اڈ ہلوک سیمینار آن تران کرسا کرے۔ بنجائی سیکرٹری حوالکاری پارے کہ پریس انفارمیشن ڈیپارٹمنٹ نا مدام کوشست مسنے کہ او ہندن ءُ پلیٹ فارم اس ایتے ہراڑے ملک انا آخبت نا بابت شرہ مننگ کے۔ اوپارے کہ گچین کاری تا بابت غٹ ءِ آگاہی فراوان کننگے کہ آخبت حکومت ءِ انت مشکل و چیلنج مون تروک مریک و او ہراوڑ ویل و چیلنج آتون مون تننگ کیک۔ اوپارے کہ ننتون نیشنل براڈ کاسٹرز و الیکٹرانک میڈیا نا پورو اسپیکٹرم اس ساڑی ءِ ہراڑے ملکی ویل و چیلنج آتیا سرجمی اٹ شرہ مننگ کیک۔ بنجائی سیکرٹری حوالکاری پارے کہ میڈیا معلومداری نا فراوانی ٹی اہم کڑد ادا کننگ ءِ۔ اینو نا سیمینار نا مسخت ہم دائس کہ گچین کاری تا بابت سیمینار نا کمک اٹ ملکی ویل آتے تالان کننگے۔ اینونا سیمینار نا مسخت ہم دا ئس کہ گچین کاری تا با بت سیمینار نا کمک اٹ ملکی ویل آتے تالان کننگے۔ اوپارے کہ سیمینار نا اڈتننگ پریس انفارمیشن ڈیپارٹمنٹ نا گچین ءُ کوشست اسے۔