اسلام آباد۔ 10 جنوری (اے پی پی) نگران وزیراعظم انوارالحق کاکڑ پارینے کہ دینی مرض آتا توننگ کن گچین سوگو و اسیجائی گام گیج آتا گرج ءِ ، جان جوڑی نا بابت تہہ و پیشن نا چیلنج آتون مون تروئی مریک، جان جوڑی نا نظام نا گچینی کن مانیٹرنگ بھاز المی ءِ۔ پاکستان ءِ موسمیاتی بدلی تا سوب آن بھاز نسخان آتون مون تروئی تمانے، غٹ ملک آتا زمواری ءِ کہ تینا شاری تے جان جوڑ و رکھ چاگڑد اس فراوان کیر۔ داخیال آتا درشانی ءِ او چارشنبے نادے آ داڑے جہانی ہیلتھ سیکورٹی سمٹ انا بنائی دود آن تران کرسا کرے۔ نگران وزیراعظم انوارالحق کاکڑ پارے کہ اولیکو جہانی ہیلتھ سیکورٹی سمٹ انا اڈتننگ پاکستان کن شرفمندی اسے، غٹ مندوبین آتا بشخ ہلنگ آ اوفتے بخیراٹ پاوہ۔ جہانی ہیلتھ سیکورٹی ساڑی آ دور انا اسہ بھاز بھلو چیلنج اسے ۔ دا سمٹ داہیت انا شاہدی ءِ کہ ہرملک انا جان جوڑی نا بشخ مچ آ دنیا تون گنڈوک ءِ۔ وزیرجان جوڑی ڈاکٹر ندیم جان سمٹ انا اڈتننگ کن سخت کوشست کرے۔ اوپارے کہ مچ آ دنیا ٹی جان جوڑی نا ویل آتا ایسر المی ءِ۔ دینی مرض آتا توننگ کن گام گیج وخت انا گرج ءِ۔ دنیا نا اسہ ملک اس ہم چائے او او اخس کہ واکدار مرے تو جان جوڑی نا چیلنج آتون تنیا مون تننگ کپک۔ آبادی ٹی ودکی، شارتا کنڈآن ترندی اٹ ہمپ و بٹ و موسمیاتی بدلی کون آ چیلنج آتون تنیا مون تننگ مفک۔ اوپارے کہ کوویڈ۔ 19، موسمیاتی بدلی تیان ودی مروک آ مرض و 2022 اٹی پاکستان اٹ بروک آ نوکاپ کون آ ویل آتیان ننا شار تا جان جوڑی بھاز زہمی مس و اوفتا راجی و زرگزرانی اثرمرتب مس۔ شون ہلوک ملک آتون تو داوڑنا ہروڑنا حالیت آتون مون تننگ و وخت آ گام گیج کن وسیلہ مریک ولے پد تموک ملک آتیکن ہم ہندن ءُ نظام اس بایدے مرے انتئے کہ پدتموک ملک آتیٹی جان جوڑی نا نظام نزور مریک ۔ کوویڈ۔ 19 آن ننے دا سبخ ملانے کہ ہروڑنا ہلہلہ ئی حالیت آتون مون تننگ کن اسیجائی گام گیج کننگے و ننا ویژن مرے کہ ہیلتھ سیکورٹی ءِ نن اسہ بنداوی حق اسےنا وڑاٹ اختیار کروئی ءِ۔ اوپارے کہ کورونا غان دنیا ٹی زرگزرانی نزوری بس۔ جان جوڑی نا بابت تہہ و پیشن نا چیلنج آتون مون تروئی مریک۔ ہیلتھ سسٹم ءِ وخت اتون سوگو کروئی مریک۔ درمان ہر شاری نا بنداوی حق ءِ۔ اوپارے کہ پاکستان موسمیاتی بدلی تیان بھاز زہمی مروک آ ملک آتیٹی اوار ءِ۔ ننے تینا جان جوڑی نا نظام و پالیسی تے موسمیاتی بدلی نا اثرآتے مون آ تخسا شین تننگ نا گرج ءِ۔ دااسہ ہندن ءُ اسیجائی زمواری اسے ہرا غٹ اتون اواری اٹ کاریم کننگ نا خواہندار ءِ۔ پاکستان اٹ موسمیاتی ناانصافی نا سوب آن 3 کروڑ 30 لکھ آن زیات بندغ زہمی مسنو، و 17 ہزار بندغ تا جان زیان مسنے وخت اس کہ 30 ارب ڈالر آن زیات نسخان مس۔ ہنداسوب آن موسمیاتی انصاف و بریبری آ تالان گام گیج آتا گرج ءِ۔ ننے نئے بیرہ تینا ملک بلکن مچ آ دنیاٹی رابطہ غاتے مون آ دروئی مریک۔ قومی حکمت عملی اتون اوار اوار جہانی فنڈنگ کن ہم وڑوڈول اس پٹنگ نا گرج ءِ تانکہ ہیلتھ سیکورٹی نا بابت اسٹ اس ہم کس اسے آن پدی سلپ۔ نگران وزیراعظم پارے کہ اسیجائی پٹ وپول آن دینی مرض آتا درمان نا وڑوڈول ءِ پٹوئی مریک۔ نظام صحت نا گچینی کن سوگو و فعال مانیٹرنگ بھاز المی ءِ۔ نگران وزیراعظم پارے کہ ہیلتھ لیبارٹریز نا انٹرنیشنل نیٹ ورک نا جوڑ کننگ و جان جوڑی نا بشخ اٹی گچین گام گیج و وسیلہ غاتیان اسہ ایلو ءِ فائدہ تننگ آن مون آ بروک خطرہ غاتون مون تننگ اٹ کمک ملنگ کیک۔ داکان بیدس خور انا رکھ اکن ریگولیشن ، آب و رابطہ نا مون آ دننگ ہم اسیجائی زمواری ءِ۔
