اسلام آباد۔ 10 جنوری (اے پی پی) نگران بنجائی وزیر قومی جان جوڑی ڈاکٹر ندیم جان پارینے کہ جان جوڑی نا نظام نا بنداوتے سوگو کننگ ننا زمواری ءِ، اقوام عالم ءِ دین تیان رکھ کننگ و جان جوڑی نا رکھ ءِ پک کننگ کن گلوبل ہیلتھ سیکورٹی سمٹ انا پاکستان اٹی اڈتننگ ستاکڑزک، مندوبین آتیا تالان دا مچی ننا اجتماعی کوشست آتیٹی تین پہ تینی کمکاری نا جوزہ غاتا درور ءِ۔ چارشنبے نادے آ گلوبل ہیلتھ سیکورٹی سمٹ آن تران کرسا وزیرجان جوڑی سمٹ انا شاندار اڈتننگ آ قوم ءِمبارکبادی تس۔ اوحکومت پاکستان و وزارت نیشنل ہیلتھ سروسز، ریگولیشن اینڈ کوآرڈی نیشن نا کنڈآن گلوبل ہیلتھ سیکورٹی سمٹ اٹی بشخ ہلوک آتے جم وجوش اٹ بخیرکرسا پارے کہ اقوام عالم ءِ دین تیان رکھ کننگ و جان جوڑی نا رکھ ءِ پک کننگ کن تاریخ اٹ اولیکو وار 2 دے ئی گلوبل ہیلتھ سیکورٹی سمٹ ءِ پاکستان اٹ اڈتننگا ہرانا بناءِ وزیراعظم پاکستان انوارالحق کاکڑ کرے، سمٹ اٹی 70 آن زیات ملک آتون جان جوڑی نا بشخ انا چوٹی نا ماہر، وزیرجان جوڑیک،مندوبین و ڈل آک بشخ ہلکر۔ اوپارے کہ ای نما مون آ مسخت و اومیت نا احساس اتون سلوک اُٹ، جہانی جان جوڑی نا رکھ انا دوئی کننگ اٹ نن نئے بیرہ تینا قوم تا نمائندہ غاتا وڑاٹ بلکن اسہ اسیجائی زموار آتا وڑاٹ دا پلیٹ فارم آ جمع مسونن، دا ننا زمواری ءِ کہ جان جوڑی نا نظام نا بنداوتے سوگو کین، مچ آ دنیا نا وزیر آک، چاہندار آک و مندوبین آتیا تالان دا اجتماع ننا اجتماعی کوشست آتیٹی تین پہ تینی کمکاری نا جوزہ نا درور ءِ۔ اوپارے کہ سمٹ ناایجنڈا بیرہ اسہ نظریاتی تعمیر اس اف بلکن جان جوڑی نا سوگو وپائیدار نظام نا تفنگ کن اسہ اسیجائی عزم ءِ۔
