کوئٹہ۔ 10 جنوری (اے پی پی) پاکستان مسلم لیگ (ن) نا راہشون و صوبائی اسمبلی نا حلقہ پی بی 44 آن پندار اومیتدار حاجی میر نوراللہ لہڑی پارینے کہ پاکستان مسلم لیگ (ن) الس نا است خواہی تا ترجمان ءِ مسلم لیگ (ن) گچین کاری تیکن میدان اٹ بسنے و ملک ءِ مون آ دننگ کن تیار ءِ، میاں محمد نواز شریف 2016ء ٹی آئی ایم ایف ءِ خداحافظ پاریسس، انشاء اللہ داسہ ہم نواز شریف ہی اقتدار اٹ برسا الس ءِ ویل آتا چنگل آن نجات ترفک۔ داہیت ءِ او چارشنبے نادے آ اسحاق آباد شائستہ ٹاؤن آن حاجی نعیم خلجی، عطاء اللہ محمد شہی، عبدالستار بادینی، عبدالجمیل ، سلام بادینی، طارق بادینی، عامر بادینی، رحمت اللہ محمد شہی، مہراللہ محمد شہی، صدام محمد شہی، گہرام محمد شہی، بشیر احمد سمالانی، جہانگیر جتک، زبیرکھوکھر، محمد عثمان محمد شہی، حبیب اللہ بالاچ زئی، نظرمحمد بالاچ زئی، حاجی درمحمد خلجی، سعید احمد جتوئی، محمد یاسین سومرو، عبدالکریم جتوئی، عبدالجبار خلجی، صلاح الدین خلجی، محمد آصف بالاچ زئی، محمد رسول خلجی، بدل مہمند، محمد انور مشوانی، محمد رحیم خلجی، نادر خان بالاچ زئی ناکماشی ٹی اوڑدہی کروک آ ڈل آتون گپ وتران کرسا پارے۔ داوخت آ ڈل گچین کاری تیٹی مسلم لیگ (ن) نا اومیتدار حاجی میر نوراللہ لہڑی ءِ تینا کنڈآن کمکاری نا باور کرفے۔ حاجی میر نوراللہ لہڑی پارے کہ مسلم لیگ (ن) مدام الس نا بے رنگ و نسل خذمت ءِ کرینے پارٹی ہم برسراقتدار بس مچ آملک اٹی شونداری کاریم کرفے۔ ۔ اوپارے کہ گوادر سی پورٹ ڈٹ ہم مسلم لیگ (ن) نا الس کن ٹیکی اسے گوادر پورٹ نا پوروی آن لکھ آ ورناتے روزگار نا وارخواہی ملک۔ اوپارے کہ مسکوہی دور اٹی اقتدار اٹی رہینگوک آ جماعت آک الس نا ہچ ءُ خذمت اس کتور، کوئٹہ شار کپی تا منظر ءِ پیش کننگ ءِ ، کوئٹہ نا شونداری کن بروک آ ارب آ روپئی نا فنڈ کرپشن نا گواچی مسر۔ اوپارے کہ الس 8 فروری آ مروک آ گچین کاری تیٹی ہمو نمائندہ غاتے مسترد کے ہرافک الس نا ہچ ءُ خذمت اس کتنو و مسلم لیگ (ن) نا اومیتدار آتا گچین کاری نشان’’شیر‘‘ آ ٹھپہ خلسا اوفتے سرسہب کیر، انشاء اللہ مسلم لیگ (ن) الس ءِ مایوس کپک۔
