اسلام آباد۔ 09 جنوری (اے پی پی) نگران وزیراعظم انوارالحق کاکڑ تعلیم، جان جوڑی و ایلو بشخ آتیٹی آسودہی ڈٹ آتیکن حکومت پاکستان نا کنڈآن یونیسیف ءِ غٹ تر آسراتی فراوان کننگ نا عزم انا درشانی ءِ کرسا پارینے کہ پسماندہ علاقہ غاتا طالب علم آتے ٹیبلیٹ آتیان پوسکن معلومداری اسکان رسینگ تننگ آن ناخواندگی ٹی خاطرخواہ کمتی اتنگ مریک۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او پاکستان اٹ یونیسیف نا نمائندہ عبداللہ فاضل تون گپ وتران کرسا کرے ہرا سے شنبے نادے آ داڑے اوڑتون اوڑدہی کرے۔ اوڑدہی ٹی عبداللہ فاضل وزیراعظم ءِ پاکستان نا چندی علاقہ غاتیٹی یونیسیف نا گام گیج آتیا حوال تس ہراٹی نگران وزیراعظم ءِ پاننگاکہ تدوک آ 5 سال اٹی یونیسیف نا رداٹ مچ آ پاکستان اٹی انسانی امداد ، ساف دیر و غذانا فراوانی، تعلیم، جان جوڑی و ایلو بشخ آتیٹی کم و ود اسہ ارب ڈالر نا ڈٹ جوڑ کننگانے۔ نگران وزیراعظم السی راجی آسودہی کن چند ی سرسہب ڈٹ جوڑ کننگ آ یونیسیف پاکستان نا ستاءِ کرے۔ وزیراعظم پاکستان اٹی پولیو تور مہم اٹی یونیسیف نا کڑدءِ خاص اہمیت تخوک گوندا۔ نگران وزیراعظم انوارالحق کاکڑ پارے کہ حکومت پاکستان ویونیسیف کون آ ادارہ غاتا تین پہ تینی کمکاری نا سوب آن ملک اٹی انسداد پولیو نا بارواٹی السی رویہ ٹی مثبت بدلی مون آ بننگ ءِ۔ وزیراعظم تعلیم ، جان جوڑی و ایلو بشخ آتیٹی آسودہی ڈٹ آتا جوڑ کننگ کن حکومت پاکستان نا یونیسیف ءِ غٹ تر آسراتی فراوان کننگ نا عزم انا درشانی ءِ کرے۔ اوپارے کہ بھارت نا کنڈآن تنقید آن پد ہم یونیسیف نا آزاد کشمیر اٹی تعلیم نا بشخ اکن گام گیج کننگ ستاکڑزک۔ نگران وزیراعظم عبداللہ فاضل ءِ پاکستان اٹ اسکول آن پیشن چناتا تعلیم کن پوسکن و گچین حکمت عملی اس ٹہیفنگ نا پارت کرے۔ اویونیسیف نا کنڈآن ملک انا پسماندہ علاقہ غاتیٹی تعلیم نا بشخ اٹی ٹیکنالوجی ءِ درستی راستی کرفنگ نا گام گیج آتا مخ تفی ءِ ہم کرے۔ اوپارے کہ ملک انا پسماندہ علاقہ غاتا طالب علم آتے ٹیبلیٹ آتا کمک اٹ پوسکن معلومداری اسکان رسینگ ترفسا ملک اٹی ناخواندگی ٹی خاطرخواہ کمتی اتنگ مریک۔ یونیسیف نا کنڈآن ورناتیکن روزگار ودی کننگ نا ڈٹ آتیکن حکومت پاکستان ہرممکن آسراتی فراوان کیک۔
