اسلام آباد۔ 08 جنوری (اے پی پی) چیئرمین سینیٹ محمد صادق سنجرانی باجوڑ نا تحصیل ماموند اٹی پولیو ٹیم انا سیکورٹی کن ہنوک آ پولیس ٹرک انا خڑک آ دھماکہ نا ترند انگا لوز آتیٹی مذمت ءِ کرینے۔ دوشنبے نادے آ سینیٹ سیکرٹریٹ آن جاری بیان نا رداٹ چیئرمین سینیٹ دا دہشت گردانہ جلہو اٹی جام شہادت نوش کروک آ چندی سیکورٹی کارندہ غاتا خاہوت آتون دلی ہڑزخواہی کرے۔ چیئرمین سینیٹ دعاکرے کہ اللہ تعالیٰ شہید آتے جنت اٹ جاگہ ایتے و غمزدہ خاہوت آتے صبر وجمیل عطاکے۔ چیئرمین سینیٹ ٹھپی تا زوت دراخ جوڑی کن دعاہم کرے۔ چیئرمین سینیٹ محمد صادق سنجرانی پارے کہ دہشت گرد شونداری نا عمل ءِ توننگ خوارہ ہراٹی او اسُل سرسہب مفسہ۔ دہشت گردی نا برخلاف جنگ اٹی پاکستان نا سیکورٹی فورس و آرمی بے مٹ قربانی تسنو۔ ڈیہہ اناامن نا بقاکن سیکورٹی فورس و الس نا قربانیک زیان مفسہ۔ چیئرمین سینیٹ پارے کہ پاکستان ڈیہہ اٹی امن کن دہشت گردی نا برخلاف مدام توار بڑزکرسا کیک۔ داوڑنا لغور جلہو ملک اٹی امن و ایمنی نا حالیت آتے لتاڑنگ کپک۔ ڈپٹی چیئرمین سینیٹ مرزامحمد آفریدی، قائد ایوان سینیٹ سینیٹر محمد اسحاق ڈار و قائد حزب اختلاف سینیٹ سینیٹر ڈاکٹر شہزاد وسیم ہم باجوڑ نا تحصیل ماموند اٹی پولیو ٹیم نا سیکورٹی کن ہنوک آ پولیس ٹرک انا خڑک دھماکہ نا ترندانگا لوز آتیٹی مذمت ءِ کرینو۔ اوفک دا دہشت گرد جلہو اٹی شہید آتا خاہوت آتون ہمدردی نا درشانی ءِ کرسا ٹھپی تا زوت دراخ جوڑی کن ہم دعاکریر۔ اوفک پاریر کہ دہشت گردآک مچ آ انسانیت نا دشمن ءُ ۔ پاکستان دہشت گردی نا ناسور ءِ چٹفنگ کن سنبرینگوک ءِ۔
