اسلام آباد۔4جنوری (اے پی پی): ادارکی مزن وزیر انوارالحق کاکڑ ءَ گوشتگ کہ پاکستان گتر ءِ گوما تجارت ءُ سرمایہ کاری ءَ ھوار توامیں شوبگ آنی تہ ءَ دو نیمگی کمک آناں ودینگ ءِ واھشت ائیگ انت، گتر ءِ نیمگ ءَ گزہ ءَ ادارکی جنگ بندی ءِ واستہ سفارتی کوشست لائک ءِ توسیپ انت، میاں اوستمانی برات ھاسیں رنگ ءَ فلسطین ءِمسلمان آنی واستہ ایمنی ءِ واستہ مھکمیں گامگیج چست کنت۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں پریس ریلیز ءِ رد ءَ پاکستان ءَ گتر ءِ سفیر علی مبارک علی عیسیٰ الخاطر ءَ ادارکی مزن وزیر انوارالحق کاکڑ ءَ گوں گند ءُ نند کت۔ ادارکی مزنک وزیر ءَ اے موہ ءَ گوشت کہ پاکستان ءُ گتر ءِ نیام ءَ مھکمیں براتی ءُ یکوئی است انت۔ پاکستان تجارت ءُ سرمایہ کار ی ءَ ھوار توامیں شوبگ آنی تہ ءَ دو نیمگی کمک آناں شاھیگانی دیگ ءِ واھشت ائیگ انت۔ آئی ءَ گوشت کہ آ سیل ءُ سواد ءُ میڈیا ءِ شوبگ ءَ کمک آنی اوست پٹ ءُ پول بکنت۔ ادارکی مزن وزیر ءَ گزہ ءَ ادارکی جنگ بندی ءِ واستہ سفارتی کوشست آنی تہ ءَ گتر ءِ کرد ءَ را ساڑات ءُ گوشت کہ فلسطین ءَ ایمنی ءِ برجائی ءِ واستہ میاں اوستمانی برات ھاسیں رنگ ءَ مسلمان آنی نیمگ ءَ یکجائی کوشست آنی ضلورت انت۔ ادارکی مزن وزیر ءَ آئی ءَ را پاکستان ءِ سفیر ءِ زمہ واری آنی وتی کوپگ آں کنگ ءِ پد ءَ مبارک بات دیان ءَ امیت سہرا کت کہ آئی ءِ پوسٹنگ ءِ ساھت ءَ دوئیں ملک آنی نیام ءَ دوستی ءِ ریشگ گیش مھکم بنت۔
