اسلام آباد۔ 04 جنوری (اے پی پی ) چیئرمین سینیٹ محمد صادق سنجرانی ایران نا شار کرمان اٹی دھماکہ غاتا ترند انگا لوز آتیٹی مذمت ءِ کرینے۔ سینیٹ سیکرٹریٹ آن جاری بیان نا رداٹ چیئرمین سینیٹ دھماکہ غاتیٹی نہادی انسانی جون تا زیان آ ڈکھیائی و است ہسونی نا درشانی ءِ کرسا پارے کہ ڈکھیائی نا داساہت اٹی ایلم ملک ایران تون سلوک اُن۔ اوپارے کہ غٹ پاکستانی تا است دُن انگا مشکل وخت اٹی تینا ایرانی ایلم تتون ءِ، انسانیت نا برخلاف گندہ انگا کارروائی تیٹی اوار غٹ شرپسند زموار آتے اوفتے اوفتا کروک نا سزا تننگ نا ہرممکن کوشست کننگے۔ چیئرمین سینیٹ دھماکہ غاتیٹی زوال کروک آ بندغ آتا خاہوت تون ہمدردی و ہڑزخواہی کرے و دعاکرے کہ اللہ تعالیٰ زوال کرو ک آ بندغ آتا بخشش و درجہ غاتے بڑز کے و ٹھپی تے زوت دراخ جوڑ کے۔ ڈپٹی چیئرمین سینیٹ مرزامحمد آفریدی، قائد ایوان سینیٹ سینیٹر اسحاق ڈار، قائد حزب اختلاف سینیٹ سینیٹر ڈاکٹر شہزاد ئسک ہم ایران نا شار کرمان اٹی دھماکہ غاتا ترند انگا لوز آتیٹی مذمت ءِ کرینو۔ اوفک پاریر کہ دا آزمائشت نا ساہت اٹی ایلم ملک ایران تون یکجہتی نا درشانی ءِ کینہ۔ اوفک تینا جتا جتا کلہو آتیٹی دھماکہ غاتیٹی زوال کروک آتا خاہوت آتون ہڑزخواہی و ٹھپی تا زوت دراخ جوڑی کن دعا کریر۔
