اسلام آباد۔ 04 جنوری (اے پی پی) نگراں وزیر آئی ٹی و ٹیلی کمیونیکیشن ڈاکٹر عمر سیف پارینے کہ پاکستان نا تاریخ اٹ اولیکو وار ٹیلی کمیونیکیشن اپیلٹ ٹریبونل اس جوڑ کننگانے ہرانا گزٹ نوٹیفکیشن ءِ کننگانے۔ ٹریبونل نا جوڑ کننگ کن ٹیلی کام ایکٹ اٹ ترمیم آتا منظوری ءِ صدر مملکت تسنے۔ ڈاکٹر عمر سیف نا رداٹ پارلیمنٹ نا ساڑی مفننگ اٹی صدارتی آرڈیننس نا رداٹ ٹیلی کام ٹریبونل کاریم کیک، اونا پاننگ ئس کہ ٹریبونل نا جوڑ کننگ ٹیلی کام سیکٹر نا متکن آ خواست ئس دا گام آن انڈسٹری ءِ بھلو ریلیف اس ملک و پدتموک چندی کیس آتے دمدستی سرتننگ مریک۔ نگراں وزیر آئی ٹی مستی پارے کہ وزارت کانود آرڈیننس نا رداٹ ٹریبونل نا چیئرپرسن و باسک آتا پنداری ءِ کیک، ٹریبونل نا چیئرپرسن بیرہ ہائیکورٹ نا جج یا 15 سال انا آزموندہ ئی وکیل ءِ جوڑ کننگ مریک۔ ہندا وڑ ٹریبونل اٹی 2 باسک ٹیکنو کریٹ مریرہ، ہرافتا کچ اٹی وخت انا رداٹ کمتی یا ودکی کننگ مریک۔ ڈاکٹر عمر سیف مستی پارے کہ پی ٹی اے نا فیصلہ نا برخلاف ٹیلی کام آپریٹرز نا منظور مروک اپیل آتیا ٹیلی کام ٹریبونل 90 دے اٹی فیصلہ کننگ نا پابند مریک۔ یات سلے کہ داکان مست پی ٹی اے و ٹیلی کام آپریٹرآتیٹی ہروڑنا آپریشنل یا سروسز جھیڑہ غا ہر فریق ہائی کورٹ تون رجوع کریکہ ہراڑان باندات آک بے گرج مرغنی نا گواچی مسرہ۔ ٹیلی کام ٹریبونل نا جوڑ کننگ دُن انگا باندات و جھیڑہ غاتے دمدستی وڑاٹ جوانی اٹ سرتننگ اٹ بھلو کمک اس فراوان کیک۔
