اسلام آباد۔ 04 جنوری (اے پی پی) بنجائی وزیر حوالکاری، شینکاری و پارلیمانی امور مرتضیٰ سولنگی ایران نا شار کرمان اٹی دہشت گرد جلہو آتا ترند انگا لوز آتیٹی مذمت ءِ کرساپارینے کہ دہشت گردی جہانی امن کن خطرہ اسے۔ پنچ شنبے نادے آ تینا بیان اٹی نگران بنجائی وزیر حوالکاری حکومت پاکستان و پاکستان نا الس نا کنڈآن ایران نا حکومت و الس تون یکجہتی نا درشانی ءِ کرے۔ اوپارے کہ دہشت گردی نا دا لغورانگا کاریم نا اخس کہ مذمت ءِ کننگے کم ءِ، پاکستان تون اوار ڈیہہ انا گیشتر ملک آک دہشت گردی نا گواچی ءُ، نن دہشت گردی ٹی دا ڈکھیائی ءِ پہہ مننگ کینہ۔ اوپارے کہ ڈکھیائی نا داساہت اٹی ایرانی حکومت و ایران نا الس تون سلوک اُن، ننا دعاک ایران نا حکومت و الس تون ءُ۔ بنجائی وزیر حوالکاری زہمی تتون ہڑزخواہی کرے و ٹھپی تا زوت دراخ جوڑی کن دعاکرے۔
