اسلام آباد۔ 04 جنوری (اے پی پی) نگران بنجائی وزیر قومی جان جوڑی ڈاکٹر ندیم جان پارینے کہ جعلی و ان رجسٹرڈ دوائی تا برخلاف کریک ڈاؤن نا چرجوئی برجاءِ، ڈریپ و ایف آئی اے کراچی ڈی ایچ اے ٹی اسہ اُراسے آ چھاپہ خلسا ان رجسٹرڈ دوائی و طبی ازباب آتا بھلو کچ اس دوئی کرینو۔ پنچ شنبے نادے آ وزارت جان جوڑی آن جاری بیان نا رداٹ ڈاکٹر ندیم جان پارے کہ ڈریپ و ایف آئی اے اسیجائی کارروائی کرسا کراچی ڈی ایچ اے ٹی اسہ اُراسے آ چھاپہ خلسا ان رجسٹرڈ دوائی و طبی ازباب آتا بھلوکچ اس ضبط کرینو۔ ضبط کروک آ غیرکانودی دوائی تیٹی اسوفلوران، سیووفلوران و ڈیسفلوران اوار ءُ۔ دا دوائی تے سرجری ٹی بے ہوشی کن کاریم اٹ اتنگاکہ۔ دافتیان بیدس ثانوی پیکنگ نا مواد ہم بھلو کچ اسے ٹی خننگانے۔ اوپارے کہ شکبر دوائی و طبی ازباب آتا کوڑی ءِ کوزہ ٹی ہلسا اوفتا وڑتے لیبارٹری ٹیسٹنگ کن گدریفنگانے۔ ہنداپرمیسر کوڈرگز ایکٹ 1976نا تعلقدار دفعہ غاتا رداٹ بند کننگانے۔ ڈاکٹر ندیم جان پارے کہ ایف آئی اے 2 دوبہ دار آتے ہم دزگیرکرینے۔ اوپارے کہ جعلی و ان رجسٹرڈ دوائی تیٹی اوار بندغ آتا برخلاف ڈغار ءِ تنگ کننگ انگ ءِ، مچ آ ملک آن جعلی و ان رجسٹرڈ دوائی تا چٹفنگ ناپکا عزم کرینن۔
