کوئٹہ۔ 04 جنوری (اے پی پی)پاکستان پیپلزپارٹی زالبول ونگ بلوچستان نا صدر و مسکوہی صوبائی وزیر غزالہ گولہ ، جنرل سیکرٹری زرینہ زہری ئسک پارینو کہ 8 فروری نا دے پاش کیک و انشاء اللہ بلاول بھٹو زرداری ملک انا پوسکن آ وزیراعظم مریک، پارٹی نا سینٹرل کمیٹی نا دیوان اٹی بلاول بھٹو زرداری ءِ بروک آ وزیراعظم پن کننگ آ مبارکبادی ایتنہ۔ داہیت ءِ اوفک پنچ شنبے نادے آ زالبول آتا دیوان آن تران کرسا پاریر۔ اوفک پاریر کہ پاکستان پیپلزپارٹی 8 فروری آ مچ آملک اٹی لس گچین کاری تیٹی پارٹی چیئرمین بلاول بھٹو زرداری، آصف علی زرداری و فریال تالپور نا کماشی ٹی پبی بشخ ہلیک و السی مینڈیٹ اٹ بروک آحکومت پیپلزپارٹی جوڑ کیک۔ اوفک پاریر کہ پاکستان پیپلزپارٹی بے رنگ و نسل انسانیت نا خذمت آ یخین تخک ، پارٹی تینا جوڑ مننگ آن ہلیس اینو اسکان الس نا حق اکن ہر پلیٹ فارم آ توار بڑزکرینے۔ اوفک پاریر کہ الس 8 فروری آ اُراتیان پیش تمسا پاکستان پیپلزپارٹی نا اومیتدارآتے وونٹ ترسا سرسہب کیر، انشاء اللہ پاکستان پیپلزپارٹی الس ءِ ویل آتیان نجات ترفنگ کن اولیتی بنداو تیا گام گیج کیک۔ اوفک پارٹی نامرکزی سینٹرل کمیٹی نا دیوان اٹی پیپلزپارٹی نا چیئرمین بلاول بھٹو زرداری ءِ پارٹی نا کنڈآن بروک آ وزیراعظم کن پندار کننگ آ اودے مبارکبادی تسر۔
