کوئٹہ۔ 03 جنوری (اے پی پی) چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر پارینے کہ پاکستان اسہ کشاری ءُ ملک اسے، اونا صنعت آتا بھلا بشخ ہم وڑانا وڑاسے ٹی کشت وکشار تون وابستہ ءِ، پاکستان نا کشاری پیدواری ہدف آتا دوئی کننگ کن ملک اٹ درکار یوریاکھد تیار کننگ انگ ءِ، کھد جوڑ کروک آ فیکٹری تے قیمت خرید آن بھاز اڑزان نرخ آتیا گیس فراوان کننگ انگ ءِ، اوکان پد ہم اڑزان کھدتیار کرسا بزغرآتے سرکننگ نا جاگہ غا اسمگل کرسا ملکی خزانہ ءِ بے بدل نسخان تننگ انگ ءِ، داڑے جاری مروک اسہ بیان اسے ٹی اوپارے کہ کھد انا اسمگلنگ نا سوب آن پاکستان اٹ اڑزان کھد بزغرآتے دوئی اف اسہ کنڈآ دا اسمگلنگ نا سوب آن پاکستان ءِ ارب آ روپئی نا نسخان تننگ انگ ءِ تو ایلو کنڈآ ملک اٹی عدم دستیابی نا سوب آن پاکستان ءِ کبین کھد درآمد کروئی تمنگ ءِ، ہندن ہراوخت ملک عزیز اسہ اسہ ڈالر کن جہانی مالیاتی ادارہ غاتا مون آ دُوتوننگ آ بیوس ءِ، داوخت آ وڈی خوری، منافع خوری، و بد انتظامی نا سوب آن بلاضرورت کھد درآمد کننگ انگ ءِ ہراسوب آن ملک ءِ ارب آ روپئی نا نسخان سگوئی تمنگ ءِ۔ اوپارے کہ ہراتم اسکان اسمگلنگ نا توننگ کن معمور ادارہ غاک قومی زمواری نا درشانی ءِ کرسا و مستعدی اٹ اسمگلنگ ءِ توننگ اٹ سرسہب مفسہ ہمووخت اسکان ملکی نسخان نا مون ءِ توننگ ممکن مننگ کپک ملک انا ترندی اٹ تموک آ زرگزران ءِ سنبھالا تننگ کن آرمی چیف جنرل عاصم منیر منہ تُو مست اسمگلنگ نا توننگ نا بابت سنجیدہ گام گیج کریسس ولے اسمگلنگ مافیاک وڑانا وڑاسے ٹی ناروا منافع کننگ و ملک ءِ نسخان تننگ اٹ سرسہب مریرہ۔ چیئرمین قائمہ کمیٹی پارے کہ بجائے دانا کہ حکومت بدانتظامی و وڈی خوری نا مون ءِ تورے حکومت آذربائیجان آن اِرالکھ ٹن کھد درآمد کننگ نا فیصلہ کرے آذربائیجان آن بیدس متحدہ عرب امارات، قطر و روس آن ہم کھد درآمد کننگ انگ ءِ، پاکستان ہمو ملک آتیان کھد درآمد کننگ ءِ ہرا کشت وکشار نا بشخ اٹی پاکستان آن بھاز پدی ئسر ، آذربائیجان آن درآمد مروک آ فی ٹن کھد 187 امریکی ڈالر آن ہم زیات نہاد آ دوئی کننگ ءِ ہراکہ پاکستانی مارکیٹ ریٹ انا اعتبار اٹ بھاز زیات ءِ۔
