کوئٹہ۔ 02 جنوری (اے پی پی)چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر پارینے کہ 10 ملین رجسٹرڈ انکم ٹیکس تروک آتیان بیرہ 3.6 ملین تینا گوشوارہ غاتے جمع کرفینو ۔ ہدف آتا رداٹ محصولات آتا وصولی کن فیڈرل بورڈ آف ریونیو ءِ سخت خواری کروئی مریک پاکستان داوخت آ بھاز مالی تنکی تون مون تننگ ءِ ، پاکستان نا شونداری و شونہالی کن ہرپاکستانی و ہر ادارہ ءِ سخت جہد کروئی مریک بدبختی اٹ ٹیکس ادا کروک آتا کچ تخوک آ بندغ و ادارہ ٹیکس انا ادائیگی نا بابت تینا قومی زمواری ءِ پورو کپسہ۔ داڑے جاری مروک اسہ بیان اسے ٹی سینیٹر محمد عبدالقادر پارے کہ پاکستان اٹی خراج دُزی نا عمومی مزاج و چاگڑد خننگک بیرہ خراج تروک آک آخا ٹیکس ہلوک آ ادارہ ہم خراج دُزی نا گندہ انگا ڈوہ ٹی اوار خننگانے بیدس داڑآن کہ فیڈرل بورڈ آف ریونیو خراج دُزآتے ہلنگ اٹ تینا مستعدی نا درشانی ءِ کے و ادارہ تون گنڈوک آفیسر و کارندہ غاک خراج دُزی نا ڈوہ ٹی بریبرنا شریک خننگانو پاکستان نا جوڑ مننگ آن ہلیس داتم اسکان داوڑ اسُل متنے کہ خراج وصولی نا ہدف ءِ دوئی کننگوئے۔ اوپارے کہ 2023اٹی آرمی چیف جنرل عاصم منیر ملک انا اقتصادی ویل آتون مون تننگ کن المی آ گڑاتا اسمگلنگ ءِ توننگ ، ڈالر نا اسمگلنگ و خراج آتا ہلنگ ءِ پک کننگ کن بھاز پبی گام گیج کرے ہرانا بھرمک دمدستی وڑاٹ خننگار روپئی نا قدر اٹی پدریسہ گچینی بس، ڈالر و کنوئی آ گڑاتا اسمگلنگ ءِ دمدستی وڑاٹ توننگ آن مچ آ ملک اٹی اجناس نا نہاد آتیٹی کمتی واقع مس و ایف بی آر نا محکمہ پاکستان نا تاریخ اٹی اولیکو وار متعین کروک ہدف آتا رداٹ خراج وصولی کننگ اٹ سرسہب مس۔ چیئرمین قائمہ کمیٹی پارے کہ ایف بی آر اسہ تُو اٹی اسہ کھرب بیست ءُ یک ارب روپئی آن زیات خراج وصولی کرسا تینا شاندار مظاہر ہ ءِ کرینے داکان بیدس 38 ارب روپئی نا ریفنڈ نا ادائیگی ہم ممکن مننگ کرے جم وڑاٹ ادارہ نا کارکڑد گچین مس اگہ ایف بی آر خراج وصولی نا کارکڑد ءِ ہندا کچ اٹ گچینی نا کنڈآ ہنا تو اومیت کننگ مریک کہ بروک آ سال تے اٹ خراج وصولی آن قومی خزانہ غا تموک آ بھاریم ءِ کم کننگ اٹ کمک رسینگک ۔
