اسلام آباد۔ 02 جنوری (اے پی پی) نگران بنجائی وزیر پارلیمانی امور مرتضیٰ سولنگی پارے کہ ملک انا زرگزرانی سمت ءِ سہی کننگ کن امنائی سلاہ ودی کننگ نا گرج ءِ، سویلی افریقہ تون دہری شہریت نا معاہدہ نا بابت باندات ءِ کابینہ ٹی پیش کننگک۔ سے شنبے نادے آ سینیٹ نا دیوان اٹی وقفہ سوج آتیٹی سینیٹر مشتاق احمد و سینیٹر کامران مرتضیٰ نا سوج آتا ورندی ٹی بنجائی وزیر حوالکاری و شینکاری و پارلیمانی امور مرتضیٰ سولنگی پارے کہ انتظامی وڑاٹ ریاست تینا کچ انا رداٹ کاریم کننگ ءِ داسہ وخت اس کہ نن گچین کاری تا کنڈآ ہِننگ اُن تو بنداوی باندات آتیا چکار کننگ نا گرج ءِ، ملک انا زرگزرانی سمت ءِ سہی کننگ کن امنائی سلاہ ودی کننگے، تانکہ ننا چناک دنیا نا چندی سمندر و کرک آتیٹی تینا جون تے تفس۔ اوپارے کہ کرپشن نا ویل اینو نا اف، قائد اعظم 11 اگست 1947آ دستور ساز اسمبلی آن تران اٹی ہرا ویل آتا کنڈآ چکار کرفے اوفتے ٹی کرپشن ہم اوار ءِ داسہ وخت اس کہ ملک اٹی لس گچین کاری مننگ والا ءِ۔ اوپارےے کہ الس اٹ شعور ودی کیر کہ ہموجماعت آتے وونٹ ایتر ہراکرپشن نا چٹفنگ کن کوشست کننگ ءُ۔ اوپارے کہ اسلام آباد کلب تون کوزہ والا ہچ ءُ جاگہ اس اف تو دا باندات ءِ وزیراعظم نا نوٹس اٹ اتنگک۔ اوکان پد چیئرمین باندات ءِ تعلقدار قائمہ کمیٹی نا دوٹی تس۔ سینیٹر مشتاق احمد نا سوج انا ورندی ٹی بنجائی وزیر پارلیمانی امور مرتضیٰ سولنگی پارے کہ اوغان باہوٹ آتا اسکول آتیٹی تعینات استاد آک یوایچ سی آر نا ملازم ئسر، حکومت پاکستان نا ملازم الور، اوفتا کچ 600 آن زیاتءِ ، اوفتے آخبتی کننگ نا ہچ ءُ پروگرام اس اف۔ سینیٹر دنیش کمار، سینیٹر مشتاق احمد و بہرہ مند تنگی نا سوج آتا ورندی ٹی بنجائی وزیر حوالکاری و شینکاری و پارلیمانی امور مرتضیٰ سولنگی ایوان ءِ پارے کہ 21 ملک آتون پاکستان نا دوہری شہریت نا معاہدہ ءِ ، سویلی افریقہ تون دہری شہریت نا معاہدہ نا بابت باندات ءِ کابینہ ٹی پیش کننگک۔
