اسلام آباد۔ 01 جنوری (اے پی پی) اسپیکر قومی اسمبلی راجہ پرویز اشرف قوم ءِ پوسکن آ سال انا مبارکبادی ترسا دااومیت نا درشانی ءِ کرینے کہ پوسکن آ سال امن و آشتی و ملک انا شونداری و شونہالی نا سال جوڑ مریک۔ اوفلسطین آ برجااسرائیلی بربریت نا مذمت کرسا فلسطینی الس تون یکجہتی نا درشانی نا وڑاٹ پوسکن آ سال انا خوشی تے بھاز سادگی اٹ اڈتننگ نا گرج آ زور شاغا۔ اواومیت نا درشانی ءِ کرے کہ ملک اٹی پوسکن آ سال اٹ اڈ ہلوک آ گچین کاری تیٹی الس تینا وونٹ انا ہندن ءُ سرکڑدہ سے گچین کیک ہرا ملک ءِ شونداری و شونہالی نا کنڈآ دیک۔ اوداخیال آتا درشانی ءِ پوسکن آ سال انا بناآ قوم انا پن تینا کلہو اٹی کرے۔ اسپیکر پارے کہ ہربروک آ سال ننے دا موقع فراوان کیک کہ نن تینا تدوک آسال انا کارکڑد اناجاچ ءِ ہلسا اوفتے پین گچین کننگ نا کوشست کین۔ اوپارے کہ عظیم قومک تینا ردینک آتیان سبخ ہلسا تینا سمت انا تعین ءِ کیرہ۔ اودااومیت نا درشانی ءِ کرے کہ پوسکن آ سال ملک اٹی شونداری و شونہالی نا پوسکن ءُ کسر استوار کیک۔ اسپیکر پارے کہ پوسکن آ سال ننے صبر و رواداری اٹ اسہ گچین ءُ قوم اسے نا وڑاٹ مون آ بننگ نا وخت اس فراوان کیک۔ اوملک انا شونداری و شونہالی کن قوم ءِ اسہ ایلو نا آختلاف آتے است آن درسا بابائے قوم قائد اعظم محمد علی جناح نا ایمان، سیوت وتنظیم و روشنا اصول آتیا کاربند مننگ نا گرج آ زور شاغا۔ اسپیکر پوسکن آ سال انا بناءآ فلسطین و کشمیر نا الس تون پورو یکجہتی نا درشانی ءِ کرسا دااومیت نا درشانی ءِ کرے کہ سال 2024اٹی اسرائیل و بھارت نا کنڈآن فلسطین و کشمیر نا الس آ کروک آ ظلم چٹک و پوسکن آ سال انا دے فلسطین و کشمیر نا آجوئی نامستائی اس اتسا پاش کیک ۔ اوفلسطین اٹ اسرائیلی فورس آتا کنڈآن برجاجارحیت و وحشیانہ بمباری نا ترند انگا لوز آتیٹی مذمت ءِ کرسا جہانی برادری آ فلسطین اٹ برجااسرائیلی جنگی ڈوہ و انسانی حق انا خلاف ورزی تا دمدستی نوٹس ءِ ہلنگ و اوفتا چٹفنگ کن گچین گام گیج کننگ نا گرج آ زورشاغا۔
