اسلام آباد۔ 01 جنوری (اے پی پی) صدر مملکت ڈاکٹر عارف علوی پوسکن آ سال انا بناآ مچ آ پاکستانی قوم ، امت مسلمہ و جہانی برادری ءِ مبارکباد پیش کرسا پارینے کہ گدرینگوک آ سال ءِ الوداع و پوسکن آ سال انا سہب ءِ بخیراٹ پارسا ای اللہ تعالیٰ آن دعاکیوہ کہ بروک آ سال پاکستان تون اوار اوار مچ آ دنیاکن شونہالی ، سیاسی و زرگزرانی سوگوی اس اتے، پوسکن آسال انابناآ نن فلسطین اٹ تیناہمو ایڑھ وایلم تے است آن دپن ہرا اسرائیلی فوج انا وحشیانہ جلہو آتون پدریسہ مون تننگ ءُ ، جہانی امن و سلامتی نا مون آ دننگ کن المی ءِ کہ جہانی برادری فلسطین وبھارت نا غیرکانودی کوزہ ٹی مقبوضہ جموں و کشمیر نا متکن آ جھیڑہ غاتا اقوام متحدہ نا قرارداد آتا رداٹ ایسری کن عملی گام گیج کے۔ ایوان صدر پریس ونگ انا کنڈآن جاری بیان نا رداٹ داخیال آتا درشانی ءِ صدر مملکت ڈاکٹر عارف علوی پوسکن آ سال 2024نا بناآ تینا کلہو اٹی کرے۔ اوپارے کہ جہانی برادری آ زور شاغیوہ کہ او غزہ ٹی نسل کشی ءِ توننگ کن دمدستی گام گیج کے و فلسطین اٹ انصاف اٹ و دیرپاامن کن کاریم کے۔ صدر ڈاکٹر عارف علوی پارے کہ ہندا وڑای غیرکانودی وڑاٹ بھارتی کوزہ ٹی جموں وکشمیر نا الس نا بارواٹی فکر مند اُٹ ہرا کوزہ گیر بھارتی فوج انا ظلم و مرغن آ گھیڑ اتون مون تننگ ءُ، جہانی امن و سلامتی نا مون آ دننگ کن المی ءِ کہ جہانی برادری دا متکن آجھیڑہ غاتا اقوام متحدہ نا قرارداد آتا رداٹ ایسری کن عملی گام گیج کے۔ صدر مملکت پارے کہ داوخت آ امت مسلمہ ءِ مون تروک چیلنج آتون مون تننگ کن اجتماعی کوشست و امت اٹ سیوت و سخا نا دعاہم کیوہ۔ اوپارے کہ اینو نادے اسہ شونال آخبت اسے نا تصور ءِ ہلسا ای پاکستان اٹ زرگزرانی شونداری، بین المذاہب ہم آہنگی، درگزر، رواداری و تین پہ تینی شرف نا دعاکیوہ، اللہ کے کہ سال 2024 نئے بیرہ پاکستان بلکن مچ آ دنیا کن مثبت بدلی تا سال مرے۔ اوپارے کہ ببو پوسکن آ سال ءِ بیابخیر دا اہمیت و عزم اتون کین کہ نن اسہ ہندن ءُ دنیا اس جوڑ کینہ ہراڑے جھیڑہ و جنگ مف وہراڑے انصاف ، امن ، شونہالی و ہمدردی نا دور دورہ مرے۔ نمے غٹ ءِ پوسکن آ سال مبارک مرے۔
