اسلام آباد۔01 جنوری (اے پی پی) نگران وزیراعظم انوارالحق کاکڑ پوسکن آ سال (2024)نا وخت آ قوم ءِ مبارکبادی ترسا پارینے کہ اللہ تعالیٰ آن دعاکیوہ کہ سال 2024 ننا ملک پاکستان کن شونداری و شونہالی نا مستائی اس اتے، تینا فلسطینی ایڑھ ایلم تتون یکجہتی نا درشانی ءِ کرسا نن پوسکن آ سال ءِ بھاز سادگی اٹ اڈتننگ اُن۔ دوشنبے نادے آ وزیراعظم نا میڈیا ونگ آن جاری کلہو اٹی نگران وزیراعظم پارے کہ پوسکن آ سال انا بناآ ای مچ آ قوم ءِ مبارکبادی ایتیوہ، نن تینا فلسطینی ایڑھ ایلم تتون یکجہتی نا درشانی ءِ کننگ کن پوسکن آ سال ءِ بھاز سادگی اٹ اڈتننگ اُن و حکومت پاکستان نا کنڈآن پوسکن آ سال انا ہروڑنا دود آتیا پابندی ءِ۔ اوپارے کہ پوسکن آ سال انا بناء آ ای اللہ تعالیٰ آن دا دعاکیوہ کہ سال 2024ننا ملک پاکستان کن شونداری و شونہالی نا نوید اس اتے۔ ای اومیت کیوہ کہ پوسکن آ سال اٹی نن تینا انفرادی و اجتماعی زند انا گچینی کن کوشست کینہ و اسہ روشنا آخبت اسے نا کنڈآ گام تے مو ن آ دینہ۔ نگران وزیراعظم پارے کہ پوسکن آ سال انا بناپاکستان و مچ آقوم اکن بھاز اہم ءِ انتئے کہ ملک اٹی امن و شونہالی نا سفر ترندی اٹ تینا مزل نا کنڈآ ہِننگ ءِ۔ کنے یقین ءِ کہ پاکستان مہالو آن زیات پرامن و سوگو زرگزرانی ملک اس جوڑ مرسا مون آ بریک۔ نگران وزیراعظم پارے کہ کنا دعا ءِ کہ 2023اٹی دنیا ءِ امن و ایمنی و قدرتی آفت آتا ہرا تنکی تا مون تروک ئس ، پوسکن آ سال اٹی اوفتا مون ءِ توننگ کن مثبت پیش رفت مرے۔ فلسطین نا مظلوم الس آ اسرائیلی بربریت سال 2023نا غٹ آن زیات غمناک ءُ بشخ اس ئس۔ غزہ و دیکی کنارہ ٹی مظلوم فلسطینی خاص کر کودک چناتا کشت وخون و کودک فلسطینی تا نسل کشی آ مچ آپاکستانی قوم و امت مسلمہ بھاز رنج و عالم اٹی ءُ۔ ای اومیت کیوہ کہ اقوام عالم 2024اٹی فلسطین اٹ امن نا قیام ، اسرائیلی خون ریزی ءِ توننگ و دانا ویل انا انصاف اٹ ایسر اٹ تینا پبی کڑد ءِ ادا کیک۔ کنا دا است خواہی و اومیت ءِ کہ سال 2024 ٹی مظلوم کشمیری الس تینا حق خودارادیت نا دوئی کننگ نا بابت آن پوسکن آ سرسہبی تا کنڈآ کار۔ اوپارے کہ پوسکن آ سال انا وخت آ شہداء وطن ءِ خراج عقیدت پیش کینہ، اوفتا خاہوت تون ہمدردی نا درشانی ءِ کینہ ، اللہ تعالیٰ شہید آتا درجہ غاتے بڑز کے۔ نگران وزیراعظم پارے کہ پوسکن آ سال انا بناآ ای زرگزرانی حالیت آتا پین گچینی ، دہشت گردی نا چٹفنگ و الس نا تکلیف آتیٹی کمتی کن تینا حکومت نا عزم نا درشانی ءِ کیوہ۔ 2024اٹی ننے غٹءِ شونداری، شونہالی و امن و آشتی نا گہوارہ اس جوڑ کروئی ءِ۔ ببو پوسکن آ سال انا بناٹی نن دا قول کین کہ دا ملک ءِ قائد اعظم نا پاکستان جوڑ کننگ کن تینا تینا کڑد ءِ خلوص نیت اٹ ادا کرسا کینہ۔
