اسلام آباد۔ 29 دسمبر (اے پی پی) مسلم لیگ (ن) نا مرکزی سیکرٹری حوالکاری مریم اورنگزیب پارینے کہ مسلم لیگ (ن) ہرپاکستانی ءِ منشور سازی نا عمل اٹ اوار کرینے۔ تاریخ اٹ اولیکو وار مسلم لیگ (ن) منشور نا تیاری کن بھلو سلابت اسے نا بناءِ کرینے۔ جمعہ نادے آ اسہ بیان اسے ٹی اوپارے کہ مسلم لیگ (ن) اسہ جماعت اسے نا آخا پاکستان نا منشور ءِ جوڑ کننگ ءِ، ہر پاکستانی ءِ سلہ ءِ کہ او تینا سلاہ تے اٹ پاکستان نا کمک ءِ کے و ہر بشخ انا چاہندار آک تینا سلاہ تے تننگ کیرہ۔ اوپارے کہ 5 جنوری اسکان اندرون و بیرون ملک ہر پاکستانی عمل نا قابل سلاہ تننگ کیک۔ نن دا چرجوئی ٹی ڈیجیٹل پورٹل http://pmln2024.com لانچ کرینن۔ آئین نا بالادستی ، کانودی اصلاحات ، انصاف نافراوانی، زرگزران، صنعت و واپار، کشت وکشار، توانائی، آئی ٹی ، آبی و غذائی رکھ آ تینا سلاہ تے ایتر۔ داکان بیدس تعلیم جان جوڑی، گوازی، امور نوجوانان، زالبول آتا شونداری و شونہالی، بلدیاتی ادارہ انسانی حق و اقلیت، جمہوری انتظامی اصلاحات، سیل و سوات، پائیدار شونداری، موسمیاتی بدلی، پاپولیشن مینجمنٹ، سٹنٹڈ گروتھ ، خارجہ امور، سمندر پار پاکستانی، مذہبی امور و بین المذاہب ہم گرنچی، نیزگاری، کبینی، بےروزگاری، میڈیا، قومی سلامتی، شونداری و شونہالی، مواصلات، مزور، خواری کش و بزغرآتا ویل، احتساب، کرپشن نا چٹفنگ، تاریخ، ، قومی میرات و کلچر ، بنجا و صوبائی ہم گرنچی، سی پیک، خصوصی بندغ آتیکن گام گیج ، نا بشخ آتیٹی عمل نا قابل و جوان سلاہ تننگ مریک۔
