اسلام آباد۔ 28 دسمبر (اے پی پی) نگران وزیراعظم انوارالحق کاکڑ عالم دین تیا زور شاغانے کہ او پاکستان ءِ پولیو آن پاک قوم اس جوڑ کننگ نا مسخت نا دوئی کننگ کن الس اٹ انسداد پولیو مہم نا بابت شعور تالان کیر، رکھ و روشنا آخبت کن جان جوڑ زند ننا چناتا حق ءِ، پولیو نا برخلاف مہم اٹی جہانی ادارہ غاتا کمکاری نا ستاءِ کینہ۔ داخیال آتا درشانی ءِ وزیراعظم پنچ شنبے نادے آ پولیو نا چٹفنگ نا بابت قومی علماکانفرنس آن بطور مہمان خاص تران کرسا کرے۔ داوخت آ بنجائی وزیر جان جوڑی ڈاکٹر ندیم جان ، وزیراعظم نا نمائندہ خصوصی مذہبی ہم آہنگی طاہر اشرفی و چندی مکتبہ فکر انا عالم دین تا بھلو کچ اس ہم ساڑی ئسر۔ وزیراعظم پارے کہ قرآن و حدیث ننا راہشونی نا گچین ذریعہ ءِ، قرآن و سنت ءِ مون آتخسا ننے اجتماعی فیصلہ کروئی ءِ۔ او چندی مکتبہ فکر انا عالم دین تا انسداد پولیو مہم نا باندات آ اجتماع ءِ ستاکڑزوک گوندساپارے کہ است خواہی ءِ کہ عالم دین غٹ قومی ویل آتا بابت ہنداوڑ یکجا مریر۔ وزیراعظم پارے کہ عالم دین تا امنائی اٹ الس اٹ انسداد پولیو مہم نا بابت امنائی سلاہ ودی مریک۔ اوپارے کہ چناتا روشنا آخبت کن جان جوڑ زند اوفتا حق ءِ۔ وزیراعظم پارے کہ نن خوش قمست اُن کہ تینا چناتا زند ءِ رکھ کننگ کینہ، غزہ ٹی چناتا اجتماعی کشت وخون مننگ ءِ، ہراانسانیت کن بھلو لمحہ فکریہ اسے۔ مسلمان مذہب یا اونا پیروکار اسے آن نفرت کپک و مدام انصاف کن بش مریک۔ وزیراعظم پولیو نا پڑی کُنفنگ ءِ غیر شرعی تکنگ ءِ بدبختی گوندسا پارے کہ عالم دینک داوڑنا زموار آتا برخلاف سلر، بیدس پٹ وپول نا پولیو پڑی تا بابت دروغ تالان کننگپ۔ عالم دینک داوڑنا مخلوق نا محاسبہ ءِ کیر۔ نگران وزیراعظم پارے کہ مسلمان معقول رویہ اختیار کروک آ مریک، نامعقول رویہ غاتا اسلام تون ہچ ءُ تعلق اس اف، قرآن مجید اٹی پٹ وپول آن بیدس ہیت اسے تالان کننگ آن منع کننگانے۔ وزیراعظم علماء حق آ زور شاغا کہ او علماء سو نا مون آ سلر، راج انا قرآن و حدیث ءِ مون آ تخسا راہشونی ءِ کیر، و حق و سچ ءِ مون آ اتیر۔ وزیراعظم انسداد پولیو مہم کن کمک فراوان کروک آاقوام متحدہ نا پروگرام، بل گیٹس و جہانی ادارہ غاتا منت واری ءِ ہرفسا پارینے کہ دا ادارہ غاک ننا چناتا جان جوڑی و روشنا آخبت کن ہرا کمک و مالی کمک فراوان کننگ ءُ اونا اعتراف ءِ کپننگ بددیانتی مریک انتئے کہ پولیو ننا بروک آ چین تیکن خطرہ اسے۔ داکان مست وزیراعظم نا نمائندہ خصوصی مذہبی ہم آہنگی و پاکستان علماء کونسل نا چیئرمین طاہر اشرفی پارے کہ عالم دینک اہم قومی ویل آتیا مدام تینا کڑد ءِ ادا کرینو، عالم دین تا دا اجتماع انسداد پولیو مہم نا بابت متفق ءُ، پولیو ویکسین اٹی غیرشرعی و نسخان دہ گڑا س اف، و دانا کاریم اٹ اتنگ جائز ءِ۔ اوپارے کہ شریعت انسانی جان تا رکھ ءِ پک کننگ نا تلقین کرینے، عالم دینک پولیو نا انسداد نا پروگرام ءِ پک کیرہ۔ وزیرجان جوڑی ڈاکٹر ندیم جان کانفرنس آن تران کرساپارے کہ وزیراعظم داکانفرنس نا اڈتننگ ناپارت کریسس انتئے کہ انسداد پولیو مہم اٹی عالم دین تا بھاز اہم کڑد اسے، اوانسداد پولیومہم کن تینا پبی کمکاری نا باوری کرفنگ آ کانفرنس اٹی شریک عالم دین تا منت واری ءِ ہرفینے۔ وزیرجان جوڑی پارے کہ عالم تا شمولیت آن انسداد پولیو مہم پین موثرمریک۔ اوپارے کہ پولیو دین انا ساڑی گری نا سوب آن پاکستان ءِ جہانی کہول آ مشکل مون تروک ءِ۔ اوپولیو ورکرآتا ہم ستاءِ کرے ہرا مشکل حالیت اٹی کاریم کننگ ءُ۔ سیکرٹری جان جوڑی افتخار شلوانی پارے کہ عالم دینک پولیو تور مہم اٹی اہم کڑد ادا کننگ کیرہ، چناک ننا قومی میرات ءُ، اوفتا رکھ ننا فرض ءِ۔
