اسلام آباد۔ 28 دسمبر (اے پی پی) پاکستان بھارت نا غیرکانودی کوزہ ٹی جموں وکشمیر اٹی مسرت عالم بٹ نا کماشی ٹی مسلم لیگ جموں و کشمیر آ پنچ سال اکن پابندی خلنگ نا بھارتی کمامدارآتا فیصلہ نا ترندی اٹ مذمت ءِ کرینے۔ دفترخارجہ نا ترجمان ممتاز زہرہ بلوچ پنچ شنبے نا دے آ داڑے ہفتہ وار پریس حوال اٹی پارے کہ کشمیری راہشون تیا پابندی خلنگ بھارت نا کنڈآن جہانی اصول آتا توہین ءِ۔ ممتاز زہرہ بلوچ علاقہ ٹی انسانی حق انا بھلا لتاڑتا مذمت ءِ کرسا پارے کہ بھارتی کوزہ گیر فوج جموں و کشمیر اٹی شاری و کشمیری راہشون تیا پابندی خلکنے۔ دا سوج انا ورندی ٹی کہ انت بروک آ سال اٹی بھارت تون تعلقداری نا بحالی نا گمان اس ارے، ترجمان پارے کہ بھارت ءِ گپ وتران کن سازگار چاگڑد ودی کننگ کن گام گیج کننگ نا گرج ءِ۔ ولے او پیدوار کرے کہ بھارت تون گپ وتران بیرہ بریبری، شرف و جھیڑہ جموں وکشمیر ءِ اولیتی ویل انا وڑاٹ شرہ ٹی اتنگ نا بنداو آ مننگ کیک۔ خلیج کمکار کونسل (جی سی سی ) نا ملک آتون تعلقداری نا بارواٹی اوپارےکہ پاکستان و جی سی سی زوت اسہ آزاد واپاری معاہدہ اس کیرہ ہرا جی سی سی نا کنڈآن ملک اسے تون دا وڑنا اولیکو معاہدہ مریک۔ اوپارےکہ دا چرجوئی ٹی گپ وتران مننگ ءِ، زوت معاہدہ غا دستخط کننگک۔ دفترخارجہ نا ترجمان ہمورپورٹ ءِ مسترد کرے ہراٹی دعویٰ کننگانے بھارت پاکستان آن لشکر طیبہ نا بانی حافظ سعید ءِ حوالہ کننگ نا خواست کرینے۔ اوپارے کہ دا قیاس آرائی تیا تالان رپورٹنگ ءِ۔ دفترخارجہ نا ترجمان پاکستان اٹ گڑاس درملکی مشن تا کنڈآن بلوچ مچی تا بابت گپ وتران ءِ نیام تمنگ گوندا و داڑآ است ہسونی نا درشانیءِ کرسا پارے کہ ملک تینا تہہ نا باندات آتے سنبھالنگ نا پورو لائخی تخک۔ ترجمان پارے کہ پاکستان نا آئین تینا شاری تے درشانی سلاہ نا آجوئی نا ضمانت ایتک و داوڑنا باندات آتے تہہ وڑاٹ مون تننگ کن کانود ساڑی ءِ۔ ترجمان نا دا بیان ناروے نا سفارت خانہ و پاکستان اٹی یورپی یونین نا سفیر نا ساڑی آ ٹویٹ آتیا اسہ سوج اسے نا ورندی ٹی بس ہراٹی اسلام آباد اٹی بلوچ مچی کروک آتون مبینہ ناروا سلوک آ گڑتی نا درشانی ءِ کننگاسس۔ ترجمان پارے کہ پاکستان اٹی درملکی سفارت خانہ غاتا نیام تمنگ افسوزناک ءِ۔ اوپارے کہ پاکستان تینا الس نا حق انا رکھ اکن سنبرینگوک ءِ۔ ترجمان مستی پارے کہ ملک انا عدالت آک وتواجہ ءُ و کیہی وارخواہی تیا دا بابت فیصلہ کرینو۔ دفترخارجہ نا ترجمان پریس حوال اٹی جہانی کہول آ پاکستان نا سرسہبی و سفارت کاری نا بشخ اٹی وزارت خارجہ نا کنڈآن کروک آ کوشست آتا سالانہ جاچ اس ہم پیش کرے۔
