اسلام آباد۔ 28 دسمبر (اے پی پی) نگران بنجائی وزیر حوالکاری ، شینکاری و پارلیمانی امور مرتضیٰ سولنگی پاکستان و ایران نا نیام اٹ اقتصادی تعلقداری و میڈیا نا بشخ آتون اوار ہڑتوم آ کنڈآتا دودوربیدہ ئی کمکاری نا مون آ دننگ کن اواری اٹ کاریم کننگ نا حکومتی عزم انا درشانی ءِ کرسا پارینے کہ پاکستان و ایران نا نیام اٹ میڈیا و چندی بشخ آتیٹی کمکاری نا مون آ دننگ کون آمعاہدہ ننا دودوربیدہ و روایت آتے حقی روشنائی ٹی پیش کننگ اٹ کمک ایتک۔ او پنچ شنبے نادے آ داڑے اوڑدہی کن بروک اسلامی جمہوریہ ایران نا سفیر رضاامیری مقدم تون گپ وتران کریکہ۔ اوڑدہی ٹی میڈیا نا بشخ آتیٹی کمکاری، دودوربیدہ ئی ڈل آتا ہن وبر، ہڑتوم آ کنڈآتا تین پہ تینی واپاری تعلقداری، ایران ایکسپو2024تون اوار چندی اہم امور تیا گپ وتران مس۔ اوڑدہی ٹی واپاری و اقتصادی بشخ خاص وڑاٹ ای سی او تنظیم نا دنگ اٹ تین پہ تینی کمکاری، دے ٹک آن دیکی اسکان راہداری، ہڑتوم آ ملک آتا بندرگاہ تیا ہڑتوم آ کنڈآتا کمکاری وتہران اسلام آباد تعلقداری ٹی ودکی نا اہمیت آ زور شاغسا ہڑتوم آکنڈآتا تین پہ تینی تعلقداری نا مون آ دننگ کن وارخواہی پٹنگ آ آمادگی نا درشانی ءِ کننگا۔ نگران بنجائی وزیر حوالکاری پارے کہ پاکستان ایران تون برادرانہ تعلقداری تے قدر انا نظر اٹ ہرک، پاکستان و ایران مذہبی، دودوربیدہ ئی و لسانی رشتہ غاتیٹی تفوک ءُ۔ مرتضیٰ سولنگی ہڑتوم آ ملک آتا نیام اٹ میڈیا نا بشخ آتیٹی کمکاری ءِ وخت انا گرج گوندسا پارینے کہ پاکستان ایران تون فلم و راگ انا بشخ آتیٹی کمکاری ءِ مون آ دننگ نا خواہندار ءِ، اوپارے کہ قومی خبررساں ادارہ ایسوسی ایٹڈ پریس آف پاکستان و ایران نا اسلامک ری پبلک نیوز ایجنسی (ارنا) نا نیام اٹ مفاہمت نا یات داشت آ مہالوآن دستخط مسنے۔ اوپارے کہ پاکستان الیکٹرانک میڈیا رریگولیٹری اتھارٹی (پیمرا)و ایران نا آڈیو ویژول و سینما نا بشخ اٹی کمکاری نا مون آدننگ کن ایم او یوآ کاریم برجاءِ۔ اوڑدہی ٹی پاکستان ٹیلی ویژن کارپوریشن و اسلامک ری پبلک آف ایران براڈ کاسٹنگ نا نیام اٹ مفاہمتی عمل ءِ ترند کننگ آ ہم امنامس۔ ایران نا سفیر اسلام آباد اٹی اسلامک ری بپلک آف ایران براڈ کاسٹنگ نا نیام اٹ مفاہمتی عمل ءِ ترند کننگ آ امنا مس۔ ایران نا سفیر اسلام آباد اٹی اسلامک ری پبلک آف ایران براڈ کاسٹنگ نا بیورو آفس ءِ ملنگ نا بابت نگران بنجائی وزیر حوالکاری ءِ معلومدار کرے۔ اوپارے کہ اسلامک ری پبلک آف ایران براڈ کاسٹنگ نا بیورو آفس بروک آ سال جنوری نا مسٹ میکو ہفتہ ٹی تینا کاریم نا بناءِ کیک۔
