کوئٹہ۔ 28 دسمبر (اے پی پی) چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر پارینے کہ سعودی عرب نا پاکستان اٹی بھلو زرکاری اسے نا بابت تدوک آ منہ تُو اٹی متنوع حوال آک زیرگردش مسنو ہرافتا بنداوی سوب ملک انا اقتصادی حالیت و اندرونی سیاسی کشمکش و نزوری ئس، ہندن ملک اٹی ساڑی غیریقینی نا کیفیت یقینی ٹی بدل مننگ بناکرے جہانی کہول آ پاکستان اٹ زرکاری نا گمان روشنامس۔ اوپارے کہ سعودی عرب نا پاکستان اٹ زرکاری نا بابت ہڑتوم آ ملک آتا نیام اٹ لیگل فریم ورک طے مسنے۔ تدوک آ کیہی ہفتہ اسکان لیگل فریم ورک انا تیاری آ کاریم برجائس۔ دا فریم ورک انا بابت زوت آتے اٹ دستخط مریک۔ زرکاری نا بابت غٹ موشگافی تے چٹفنگانے، ہڑتوم آ ملک آتا بڑزکو کمامدارآک فریم ورک نا تیاری ٹی بھاز مہارت و عرق ریزی اٹ کاریم ہلکنو۔ عموماََ درملکی زرکار آک تینا زرکاری کن جہانی آب انا رکھ اتون گنڈوک شق آتے معاہدہ ٹی اوار کرفنگ خوارہ، اوپارے کہ درملکی زرکاری پاکستان نا اندرونی سیاسی و عدالتی باندات آتا سوب آن بھاز بے وڑ زہمی مسنے، دابابت ہم درملکی زرکارآتے پیدوار ریلیف تننگ و یقین دہانی کرفنگانے، دا چرجوئی ٹی ننا سیکورٹی ادارہ غاک بے کچ اہم و زموارانہ کڑد ادا کرینو، سپہ سالار پاکستان نا فوج جنرل عاصم منیر ملکی شونداری و شونہالی نا بابت چندی مثبت گام گیج کرے ہرانا سوب آن روپئی نا قدر اٹی ودکی مس و اسمگلنگ نا مون ءِ توننگ ممکن مس۔ چیئرمین قائمہ کمیٹی مستی پارینے کہ پاکستان سعودی عرب آن 25 ارب ڈالر زنا زرکاری نا گمان کننگ ءِ، داکان بیدس قطر ، یواے ای و کویت آن ہم بھلا زرکاری نا آثار نظر بننگ ءِ، دا بابت ایس آئی سی ایف نا کڑد بھاز اہمیت تخک۔ زرکارآتیکن ون ونڈو آپریشن ءِ بھاز فعال کننگانے تانکہ درملکی زرکارآتے ہروڑنادشواری اتون مون تروئی تمپ۔ زرکارآک وخت ءِ زیان کننگ ءِ اسہ بھلو ڈوہ اس تکرہ ہندا سوب آن اوفتا پورو کوشست مریک کہ اوفتے بے سوب پروسیجر سختی تتون مون تروئی تمپ۔ آرمی چیف جنرل عاصم منیر درملکی زرکارآتے رکھ فراوان کننگ کن فول پروف سیکورٹی ءِ پک کننگ نا پرمان کرینے۔ ملک اٹی امن و ایمنی نا عمومی حالیت آتے بیف اپ کننگ آ زور شاغنگانے۔
