کوئٹہ۔ 28 دسمبر (اے پی پی)پاکستان مسلم لیگ (ن) زالبول ونگ انا راہشون فاطمہ خان پارینے کہ پاکستان نا زرگزرانی شونداری مسلم لیگ (ن) نا اولیت ءِ الس ءِ کبینی آن ہمووڑ نجات ترفنہ ہراوڑ میاں نواز شریف لوڈشیڈنگ ، دہشت گردی و بدامنی آن نجات ترفیسس، 8 فروری نا دے مسلم لیگ (ن) نا سرسہبی نا مستائی ءِ ترسا پاش کیک ، زالبول آک پارتی نا کلہو ءِہراُراغا سرکیر و گچین کاری تا دے زالبول آک زیات آن زیات اُراتیان پیش تمسا تینا وونٹ ءِ بِٹر۔ داہیتءِ او تینا ہنکین آ زالبول آتا اسہ دیوان اسے آن تران کرسا پارے۔ فاطمہ خان پارے کہ بروک آ گچین کاری تیٹی مسلم لیگ (ن) ملک گیر سرسہبی دوئی کیک و پارٹی قائد میاں نواز شریف چارمیکو وار وزیراعظم جوڑ مرسا ملک ءِ تنکی تیان کشک و کبینی نا چکی ٹی خوڑت مروک الس ءِ ریلیف ایتک۔ اوپارے کہ بلوچستان اٹی مسلم لیگ (ن) صوبائی صدر شیخ جعفر خان مندوخیل و ایلو سرکڑدہ غاتا کماشی ٹی فعال و منظم ءِ، انشاء اللہ بروک آ دور مسلم لیگ (ن) نا ءِ، و مسلم لیگ (ن) 8 فروری نا گچین کاری تیٹی کلین سویپ کیک۔ اوپارے کہ مسلم لیگ (ن) نا ودوک آ مقبولیت آن مخالف آتا تغ حرام مسنے و اوپارٹی نا برخلاف منفی پروپیگنڈاٹی لگوک ءُ ولے الس وونٹ انا کمک اٹ منفی پروپیگنڈا کروک آتے مسترد کیک۔ اوپارے کہ مسلم لیگ (ن) نئے مہالو الس ءِ مایوس کرینے و نئے مون آکیک ، انشاء اللہ الس نا وونٹ اٹ برسراقتدار برسا الس نا ویل آتے ایسر کننگ کن اولیتی بنداوتیا گام گیج کننگک ۔
