لاہور۔ 27 دسمبر (اے پی پی) نگران بنجائی وزیر حوالکاری، شینکاری و پارلیمانی امور مرتضیٰ سولنگی پارینے کہ موسمیاتی بھسکاری غٹ آن بھلا چیلنج ءِ، ملک ءِ بھلا و متنوع چیلنج مون تروک ءِ ہرافتامون ءِ توننگ کن پٹ وپول و علم انا دوئی کننگ المی ءِ، علم انا دوئی کننگ آن ملک شونداری کننگ کیک۔ داہیت ءِ او چارشنبے نادے آ داڑے انفارمیشن ٹیکنالوجی یونیورسٹی پنجاب نا چارمیکو کانووکیشن آن تران کرساپارے۔ داوخت آ گورنرپنجاب بلیغ الرحمان ، وائس چانسلر آئی ٹی یو پروفیسر ڈاکٹر عدنان نور، چندی جامعہ غاتا وائس چانسلر ، ڈینز، فیکلٹی باسک و طالب علم آتا بھلو کچ اس ساڑی ئسر۔ بنجائی وزیر حوالکاری پارے کہ پاکستان ءِ بھلا و متنوع چیلنج مون تروک ءِ ہرافتے ٹی زرگزرانی بدحالی، بے سگی و بیدادی رویہ اوار ءِ۔ دا چیلنج آتا مون ءِ توننگ کن طالب علم آتا اہم کڑد آ زور شاغسا اوپارے کہ قومک چیلنج آتون مون ایترہ، چیلنج آتون مون تننگ کن تعلیم غٹ آن اہم ذریعہ ءِ، انسانیت غٹ مذہب آتا نصب العین مسنے، و ہندا مسخت تعلیم نا ءِ کہ نن اسہ گچین ءُ انسان اس جوڑ مرین۔ اوپارے کہ موسمیاتی بھسکاری غٹ آن بھلا چیلنج ءِ، موسمیاتی ایمرجنسی نا اثرآتے نن ہڑدے خننہ، ننے قدرتی چاگڑدنا رکھ اکن تینا کڑ د ءِ ادا کروئی مریک۔ منفی پروپیگنڈا نا چٹفنگ نا گرج آ زور شاغسا نگران بنجائی وزیر پارے کہ بدبختی اٹ دا وخت آ گڑاس مخلوق ریٹنگ نا چکر اٹ سوشل میڈیا غا غلط و دروغ انا خبرتالان کیرہ ہرافتا ننے مقابلہ ءِ کروئی مریک۔ اوپارے کہ انفارمیشن ٹیکنالوجی یونیورسٹی کون آ ریسرچ یونیورسٹی ہرابنداو آجوڑ مسنو،اگہ اوفتے برقرارتخنگے تو مشکل آتا ایسر اس پیش تمک ۔ نگران بنجائی وزیر حوالکاری دا بابت پنی آ جرمن ڈرامہ نگار بہٹولٹ بریٹ نا پنی آ راگ’’دی ایکسیپشن اینڈ دی رول‘‘ (استثناءو قاعدہ) نا پرولاگ انا ہم حوالہ ءِ تس۔ کانووکیشن اٹی 524 طالب علم آتے ڈگری ہم تننگا وخت اس کہ پنچ طالب علم ءِ پی ایچ ڈی و 16 طالب علم آتے گولڈمیڈل تننگا۔
