اسلام آباد۔ 27 دسمبر (اے پی پی) نگران وزیر واپار گوہر اعجاز پارینے کہ انفارمیشن ٹیکنالوجی نا بشخ اکن خصوصی اقتصادی زون نا جوڑ کننگ آن برآمد آتیٹی نمان ودکی ممکن مریک، وزارت واپار پاکستانی افرادی قوت نا مہارت اٹ ودکی کن گام گیج کننگ اٹی ءِ۔ اوداخیال آتا درشانی ءِ چارشنبےنادے آ کراچی ٹی خصوصی اقتصادی زون تا حالیت آتا جاچ ءِ ہلنگ کن دیوان نا کماشی ءِ کرسا کرے۔ وزارت واپار نا سیکرٹری صالح احمد فاروقی، سیکرٹری صنعت و پیدوار راشد لنگڑیال، زرکاری بورڈ انا سیکرٹری سہیل احمد راجپوت و ایلو سینئر کمامدارآک بشخ ہلکر۔ دیوان اٹی پورٹ قاسم اسپیشل اکنامک زون نا آپریشنل حالیت آتا جاچ ءِ ہلنگا و پاننگاکہ دا زون زرکار آتیکن تیار ءِ۔ دیوان ءِ پاننگاکہ زون اٹی بنداوی خذمت آتا فراوانی آ عمل کننگانے و کاروبار نا مون آ دننگ کن ہر آسراتی نا بست وبند ءِ کننگانے۔ ڈاکٹر گوہر اعجاز پارے کہ ملکی زرگزران و برآمد آتیٹی ودکی کن پیدوار و برآمد آتیٹی تنوع و نمو المی ءِ۔ انفارمیشن ٹیکنالوجی کن خصوصی زون جوڑ کننگ اہمیت تخک، داڑآن پاکستان اٹ جدت وتکنیکی شونداری ءِ مون آ دننگ اٹ کمک رسینگک۔ دیوان اٹی لیبر فورس انا مہارت ءِ ودفنگ کن گام گیج آتا ہم جاچ ءِ ہلنگا۔ دیوان ءِپاننگاکہ وزارت واپار افرادی قوت خاص وڑاٹ آئی ٹی نا بشخ اٹی مہارت و کاریم نا کچ اٹی گچینی کن پروگرام نابناءِ کننگ ءِ۔ دا سٹریٹجک نقطہ نظرآن آئی ٹی نا برآمد آتے مون آ دننگ و آئی ٹی نا جہانی صنعت اٹ پاکستان ءِ اسہ مسابقتی ملک اسے نا وڑاٹ سلنگ نا مسخت دوئی کننگ اٹ کمک رسینگک۔ ڈاکٹر گوہر اعجاز جوان شونداری و نموءِ پک کننگ کن سرکاری بشخ انا است بڈی نا اہمیت ءِ تالان کرے۔ اوپارے کہ پائیدار اقتصادی شونداری کن حکومت و نجی بشخ ءِ اسیجاکوشست کروئی مریک انتئے کہ حکومت و نجی بشخ اواری اٹ شونداری نا رفتار ءِ ودفنگ کیرہ۔
