اسلام آباد۔ 27 دسمبر (اے پی پی) نگران وزیراعظم انوارالحق کاکڑ پارینے کہ آئی ٹی نا بشخ ملکی زرگزران اٹ اہم کڑد ادا کننگ کیک، حکومت آئی ٹی نا بشخ اٹی پیشن نا زرکاری کن گام گیج کننگ ءِ و دا رداٹ مثبت پیش رفت مسنے۔ داخیال آتا درشانی ءِ او چارشنبے نادے آ داڑے تینا کماشی ٹی اسپیشل ٹیکنالوجی زونز اتھارٹی نا بورڈ آف گورنرز نا پنچ می دیوان آن تران کرسا کرے۔ وزیر اعظم آفس نا میڈیا ونگ انا کنڈآن جاری بیان نا رداٹ وزیراعظم دیوان آن تران کرسا پارے کہ پاکستان اٹ انفارمیشن ٹیکنالوجی نابشخ اٹی شونداری بے حد کچ ساڑی ءِ۔ وزیراعظم پارت کرے کہ پاکستان اٹ آئی ٹی نا شونداری و مون آ دننگ کن مچ آ دنیا غان آئی ٹی چاہندار آتے اتنگ کن المی پالیسی جوڑ کننگے۔ اوپارے کہ حکومت آئی ٹی نا بشخ اٹی پیشن نا زرکاری کن گام گیج کننگ ءِ و دابابت مثبت پیش رفت ہم مسنے۔ دیوان اسپیشل ٹیکنالوجی زونز اتھارٹی نا بورڈ آف گورنرز نا چارمیکو دیوان نا فیصلہ غاتے پک کرے وخت اس کہ اسپیشل ٹیکنالوجی زونز اتھارٹی نا بورڈ آف گورنرز نا بجٹ و فنانس، آڈٹ و ٹیکنیکل کمیٹی تا اول سرآن ٹہیفنگ نا منظوری ءِ ہم تننگا۔ دیوان اتھارٹی نا لائسنسنگ فریم ورک، اتھارٹی پروسیجرز و فیس ریگولیشنز نا مسودہ غاتے ٹیکنیکل کمیٹی نا مون آ پیش کننگ نا منظوری ءِ ہم تس۔ دیوان اٹی اسپیشل ٹیکنالوجی زونز اتھارٹی نا بابت چندی امور آ شرہ مس۔ دیوان اٹی بنجائی سیکرٹریز کابینہ، خزانہ، انفارمیشن ٹیکنالوجی، سائنس اینڈ ٹیکنالوجی، ہر چار آ صوبہ غاتا چیف سیکرٹری و ایلو بورڈ باسک آک بشخ ہلکر۔
