پوسکن آ دور اٹی پاک چین تعلقداری، چین پاکستان اقتصادی راہداری نا دہ سال و پاکستانی میڈیا ٹی دانا بابت کوریج
اسلام آباد۔ 26 دسمبر (اے پی پی) 23 و24 دسمبر آ انڈس براڈ کاسٹنگ اینڈ کمیونیکیشن نا کنڈآن اسلام آباد نا ہندی ہوٹل اٹی اِرادے ئی ہیلکاری ورکشاپ اس اڈتننگا۔ ورکشاپ اٹی گوادر تون اوار مچ آملک آن صحافیک بشخ ہلکر۔ ورکشاپ اٹی بنجائی وزیر حوالکاری و شینکاری مرتضیٰ سولنگی، مسکوہی سفیر نغمانہ ہاشمی، قومی سلامتی نا مسکوہی سلاہکار ڈاکٹر معید یوسف، نگران وزیر صنعت وواپار و فنی تعلیم خیبرپختونخوا ڈاکٹر عامر عبداللہ، کمیونیکیشن سٹریٹجسٹ ریماشوکت، ڈائریکٹر پاکستان انسٹی ٹیوٹ آف چائنا سٹڈیز ڈاکٹر فضل الرحمان، سینئر صحافی شاہد رند تون اوار پنی آ صحافیک گپ وتران کریر۔ بنجائی وزیر حوالکاری و شینکاری مرتضیٰ سولنگی پارے کہ میڈیا ءِ پاکستان وچین تون اوار خارجہ تعلقداری تا بابت رپورٹنگ کننگ نا وخت آ قومی فائدہ غاتے بایدے ملحوظ خاطر تخے۔ نگران حکومت اٹی ہم سی پیک آ کاریم برجاءِ و ہڑتوم آ ملک آتا نیام اٹ کمکاری ءِ مون آ دننگانے۔ چین اٹی پاکستان نا مسکوہی سفیر نغمانہ ہاشمی گپ وتران کرسا پارے کہ پاک چین تعلقداری نا بابت رپورٹنگ کننگ نا وخت آ تاریخی پس منظر و سہی معلومداری نا بابت آگاہی المی ءِ۔ قومی سلامتی نا مسکوہی سلاہکار ڈاکٹر معید یوسف بشخ ہلوک آتے زرگزرانی و سیکورٹی چیلنج آتیان معلومدار کرے و قومی سلامتی پالیسی نا اہم ٹک آتے مون آ تخا۔ نگران وزیر صنعت و واپار و فنی تعلیم خیبرپختونخوا ڈاکٹر عامر عبداللہ سی پیک نا رداٹ جوڑ رشکئی اکنامک زون آ پیش رفت نا بابت صحافی تے معلومدار کرے۔ کمیونیکیشن سٹریٹیجسٹ ریما شوکت چین نا کمک اٹ گوادر اٹی کمیونٹی نا گچینی کن برجاڈٹ آتیا است انا حب اٹ گپ وتران کرے۔ ڈاکٹر فضل الرحمان چین نا پالیسی سازی، ہڑتوم آ کنڈآتا تعلقداری، مون تروک چیلنج، چین و پاکستانی میڈیا کوریج تون اوار ایلو اہم باندات آ بشخ ہلوک آتے معلومداری فراوان کرے۔ سینئر صحافی شاہد رند بلوچستان نا رداٹ سی پیک نا اہمیت و ہندی کمیونٹی نا مشکل آتیا گپ وتران کرے۔ ایسوسی ایٹڈ پریس آف پاکستان نا چائنا نیوزڈیسک تون گنڈوک صحافی بشریٰ نذیر اے پی پی ٹی چائنا نیوز ڈیسک نا جوڑ کننگ، گرج و مسخت و ساڑی آ سرجزآتیا بشخ ہلوک آتے بریف کرے، ورکشاپ نا ایسرآ بشخ ہلوک آتے سند تننگا۔
