راولپنڈی۔ 26 دسمبر (اے پی پی) اینٹی نارکوٹکس فورس (اے این ایف) منشیات اسمگلنگ نا برخلاف 8 کارروائی تیٹی 1 ٹن 903 کلوگرام آن زیات منشیات دوئی کرسا 7 دوبہ دار ءِ دزگیرکرے۔ ترجمان اے این ایف نا رداٹ علامہ اقبال ایئرپورٹ آ بذریعہ جہاز نمبر PA-470جدہ غا ہنوک آ مسافر آن 3 کلوگرام آئس دوئی کننگا۔ جناح ایئرپورٹ آ بذریعہ جہاز نمبر TG-342بنکاک آ ہنوک آ اِرا مسافر آتیان 1 کلو گرام ہیرون دوئی کننگا۔ علامہ اقبال ایئرپورٹ لاہور آ مسافر اسے نا پڈآن 52 آئس آن پُر کیپسول دوئی کننگا، دوبہ دار جہاز نمبر QR-629نا کمک اٹ دوحہ کن روانہ مسکہ۔ باچاخان انٹرنیشنل ایئرپورٹ آ مسافر نا پڈ آن 24 آئس آن پُر کیپسول دوئی کننگا، دوبہ دار جہاز نمبر ER-751کمک اٹ شارجہ کن روانہ مسکہ۔ پشین اٹی اُراسے آن 1500 کلوچرس و 200 کلوہیرون دوئی کننگا۔ فیروز والاسٹاپ لاہور نا خڑک لاوارث گاڈی اسے آن 120 کلوچرس و9.6کلوہفیم دوئی کننگا۔ راوی موٹروے ٹول پلازہ لاہور نا خڑک گاڈی اسے آن 33.6 کلوچرس و 26 کلو ہفیم دوئی کرسا اِرا دوبہ دار ءِ دزگیرکننگا۔ خیبرنا علاقہ زخہ خیل آن 10 کلوگرام چرس دوئی کننگا۔ ترجمان پارے کہ دزگیر دوبہ دار آتا برخلاف انسدادِ منشیات ایکٹ نا رداٹ مقدمہ درج کرسا جاست وپاست نا بناءِ کننگانے۔
