کرسمس مہرومریبت ، قربانی و امن نا کلہو ایتک، مشعال ملک

اسلام آباد۔ 22 دسمبر (اے پی پی) وزیراعظم نا خصوصی کمکار انسانی حق و شونداری نسواں مشعال حسین ملک پارینے کہ غٹ مذہب آتا مخلوق ءِ متحد کرسا جہانی امن قائم کننگ مریک، کرسمس مہرومریبت ، قربانی وامن نا کلہو ایتک۔ داخیال آتا درشانیءِ او جمعہ نادے آ نظریہ پاکستان کونسل نا کنڈآن کرسمس کیک اس کاٹ کننگ نا دود آن تران کرساکرے۔ اوچندی مذہبی پس منظر تخوک آ بندغ آتا نیام اٹ ہم گرنچی و افہام و تفہیم ءِ مون آ دننگ نااہمیت آ زور شاغا۔ فوکل پرسن سبین حسین ملک، چیئرمین نظریہ پاکستان کونسل میاں جاوید، ایگزیکٹیو ممبر نظریہ پاکستان کونسل منظور مسیح، فیصل زاہد ملک، برطانیہ ٹی پاکستان نا مسکوہی ہائی کمشنر صلاح الدین، نرگس و خالد سلہری دود اٹی بشخ ہلکر۔ مشعال حسین ملک پارے کہ ہرمذہب مہرومریبت، قربانی و امن نا درس ایتک۔ اوپارے کہ ویٹی کن نا پوپ اتون اوڑدہی ٹی او کثیر العقیدہ ہم گرنچی جہانی امن کن اہم گوندا۔ اوپارے کہ کشمیر و فلسطین تون اوار جہانی جھیڑہ غاتا ایسر غٹ مذہب آتیٹی سرایت مہرومریبت ، امن وہم گرنچی نا کلہو آتا تبلیغ اٹی تخوک ءِ۔ اومچ آ دنیا ٹی مظلوم آتون یکجہتی نا درشانی ءِ کننگ نا گرج آ زور شاغا۔ مشعال ملک پارے کہ جڑانوالہ واقعہ غان پد پسکتانی راج انا غٹ تپہ غاتا کنڈآن امنائی مذمت ستاکڑزک۔ اوواقعہ نا ورندی ٹی حکومت نا کنڈآن کروک آ گام گیج آتا ستاء ءِ کرے۔ اوسول سوسائٹی نا کنڈآن امن ریلی تا ہم ستاءِ کرے و دااجتماع تیٹی لس شاری تا خاطرخواہ بشخ ہلنگ نا ستاءِ کرے۔