گچین کاری تا اڈتننگ اٹ ہچ ءُ تاخیر اس اف، گچین کاریک تینا تخوک آ وخت 8 فروری 2024ء آ مریرہ، مرتضیٰ سولنگی

اسلام آباد۔ 22 دسمبر (اے پی پی) نگران بنجائی وزیر حوالکاری، شینکاری و پارلیمانی امور مرتضیٰ سولنگی پارینے کہ مالی، انتظامی و سیکورٹی نا بابت ہچ ءُ دُن ءُ حالیت اس اف ہرا گچین کاری تیٹی تاخیر نا سوب جوڑ مرے، گچین کاریک تینا تخوک آ وخت 8 فروری 2024ء آ مریرہ، چیف الیکشن کمشنر آ ننے پبی پت ءِ، غٹ سیاسی جماعت آتون جوان تعلقداری خوانہ۔ جمعہ نادے آ داڑے انفارمیشن سروس اکیڈمی نا پیشن میڈیا تون گپ وتران کرسا نگران بنجائی وزیر حوالکاری پارے کہ پیمرا ایکٹ اٹ صحافی تے رکھ دوئی ءِ۔ اوپارے کہ میڈیا نا ادارہ غاک ہراتم پیمرا غان لیسن ہلیرہ تو تینا مچ آ فزیبلٹی و بزنس پلان شیئر کیرہ۔ صحافی و میڈیا ورکرآتے ملازمت آتیان کشنگ است ہسونی اسے، دا بابت چیئرمین پیمراتون ہیت کننگک کہ کانود نا رداٹ دا ورکرآتا رکھ اکن انت گام گیج کننگ مریک۔ اوپارے کہ وزارت حوالکاری و تعلقدار ادارہ غاک دانا نوٹس ءِ ہلیرہ۔ اسہ سوج اسے نا ورندی ٹی اوپارے کہ بلوچستان آن بروک آ مچی کروک آتا بابت جوڑ کروک آ کمیٹی تینا کاریم ءِ کننگ ءِ، دا مچی کروک آتا خواست آک اینو نا آخا ، کیہی دہائی مست انا ءُ ، ننا پورو کوشست ءِ کہ دا ویل آتے ایسر کین۔ اوپارے کہ تدوک آ دے ہم ننا مچی کروک آتون مذاکرات مس، زالبول و چناک بھاز مشکل حالیت آتیٹی ئسر، ننا کوشست ئس کہ اوفتے بحفاظت تینا اُراتیا پدی گدریفنگے۔ دا چرجوئی ٹی نن گڑاس بست وبند ہم کرین ولے او پدی ہِننگ خواپسہ، زالبول و چناتے دمدستی وڑاٹ یلہ کننگا، دا ویل داسکان چٹتنے، کمیٹی ساڑی ءِ و تینا کاریم ءِ کننگ ءِ۔