جہانی برادری فلسطین اٹ دمدستی جنگ بندی کن تینا کڑد ءِ اداکے، نگران بنجائی وزیر حوالکاری مرتضیٰ سولنگی نا اردن نا سفیر تون اوڑدہی ٹی گپ وتران

اسلام آباد۔ 21 دسمبر (اے پی پی) نگران بنجائی وزیر حوالکاری، شینکاری و پارلیمانی امور مرتضیٰ سولنگی فلسطین اٹی کمکی سرجزآتیٹی اردن نا کڑد انا ستاءِ کرسا پارینے کہ فلسطین اٹ امن مچ آ دنیا نا زمواری ءِ ، جہانی برادری فلسطین اٹ دمدستی جنگ بندی کن تینا کڑد ءِ اداکے۔ داہیت ءِ او پنچ شنبے نادے آ اردن نا سفیر ڈاکٹر معن خریسات تون اوڑدہی ٹی گپ وتران کرسا پارے۔ اوڑدہی ٹی ہڑتوم آ ملک آتیٹی بروک آ لس گچین کاری، فلسطین و اسرائیل نا نیام اٹ جنگ بندی، علاقائی سلامتی نا حالیت، میڈیا نا بشخ آتیٹی کمکاری تون اوار ایلو اہم امور تیا گپ وتران مس۔ نگران بنجائی وزیر حوالکاری پارے کہ پاکستان اردن تون تینا تعلقداری تے قدر انا نظر اٹ ہرک، ہڑتوم آ ملک آتا نیام اٹ مذہب، قدر و دودوربیدہ غا تالان تعلقداری ءِ۔ اوڑدہی ٹی فلسطین و اسرائیل نا نیام اٹ بے چیٹ حالیت آتیا گڑتی ان درشانی ءِ کننگا۔ بنجائی وزیر حوالکاری پارے کہ فلسطین نا ساڑی حالیت نئے بیرہ مسلم امہ بلکن مچ آ دنیا نا مہذب قوم تیکن گڑتی نا سوب ءِ، فلسطین اٹ امن مچ آ دنیا نا زمواری ءِ ، جہانی برادری فلسطین اٹ دمدستی جنگ بندی کن تینا کڑد ءِ اداکے۔ اوپارے کہ فلسطینی الس تون پورو یکجہتی نا درشانی ءِ کینہ ، فلسطین اٹی کمکی سرجزآتیٹی اردن نا کڑد ستاکڑزک۔ داوخت آ اردن نا سفیر پارے کہ غزہ ٹی خور انا عدم دستیابی نا سوب آن انسانی تنکی ودی مننگ ءِ۔ اوڑدہی ٹی پاکستان و اردن اٹی بروک آ سال مروک آ گچین کاری تا بابت ہم گپ وتران مس۔ بنجائی وزیر حوالکاری مرتضیٰ سولنگی اردن نا سفیر ءِ پاکستان اٹ گچین کاری تا کنڈآ مروک آپیش رفت آن معلومدار کرسا پارے کہ بروک آ سال 8 فروری آ مچ آملک اٹی گچین کاریک مریرہ، الیکشن کمیشن آف پاکستان گچین کاری شیڈول  ءِ جاری کرینے، غٹ رجسٹرڈ سیاسی  جماعت آتے گچین کاری مہم کن 54 دے فراوان کننگانے۔ اوپارے کہ نگران حکومت صاف، شفاف و بے کنڈ ہلوک گچین کاری تا اڈتننگ ءِ پک کننگ کن الیکشن کمیشن ءِ ہرممکن کمک و آسراتی فراوان کننگ ءِ۔ بنجائی وزیر حوالکاری اردن اٹ بروک آ سال مروک آ گچین کاری عمل نا سرسہب پوروی کن ہم نیک است خواہی نا درشانی ءِ کرے۔ اوڑدہی ٹی پاکستان و اردن نا نیام اٹ  میڈیا و حوالکاری نا بشخ آتیٹی کمکاری ءِ ودفنگ آہم زور شاغنگا وخت اس کہ پی ٹی وی، اے پی پی، ریڈیو پاکستان و اردن نا ریڈیو، ٹیلی ویژن و اردن نیوز ایجنسی پیٹرانا نیام اٹ مفاہمت نا یات داشت آتیا ہم گپ وتران مس۔ اوڑدہی ٹی ہڑتوم آ ملک آتا ریاستی میڈیا ادارہ  غاتا نیام اٹ کمکاری کن مفاہمت نا یات داشت آتا عمل ءِ ترند کننگ آ ہم امنا مس۔ نگران بنجائی وزیر حوالکاری ہڑتوم آملک آتا نیام اٹ میڈیا ڈل آتا ہن و برنا گرج آ زور شاغا۔