پاکستان اٹی ایگزم بینک انا بناآن برآمد آتیٹی ودکی، پوسکن آ جہانی منڈی تسکان رسینگ اٹ کمک رسینگک، وزیرخزانہ ڈاکٹر شمشاد اختر

اسلام آباد۔ 21 دسمبر (اے پی پی) نگران بنجائی وزیر خزانہ، محصولات و اقتصادی امور ڈاکٹر شمشاد اختر پارینے کہ پاکستان اٹ ایگزم بینک انا بناآن برآمدآتیٹی ودکی و پوسکن آ جہانی منڈی تسکان رسینگ اٹ کمک رسینگک، بینک انا جوڑ کننگ آن پاکستانی برآمد کروک آتے کریڈٹ انشورنس و گارنٹی نا خذمت ہم دُوبریک، ادائیگی تیٹی بریبری، اقتصادی نمو و زرگزران اٹ پائیداریت نا سیبو زرگزران نا پنجر آٹی ءِ ہراٹی برآمد آتا اہم ءُ کڑد اسے، ننے اومیت ءِ کہ ایگزم نا بناآن مالیاتی چاگڑد اٹی گچینی، ٹیکنالوجی نا گچین کاریم اٹ اتنگ و ٹیکسٹائل آن بیدس ایلو بشخ آتیٹی ودکی مننگ کیک۔ پنچ شنبے نادے آ پاکستان اٹ ایگزم بینک انا بنانا وخت آ اڈ ہلوک دود آن تران کرسا وزیرخزانہ ڈاکٹرشمشاد اخترپارینے کہ دا ملکی زرگزران، واپار و زرکاری کن اسہ مزل نا نشان اسے نا حیثیت تخک و دا ننکن فخر انا  لمحہ سے ، جوان سرکڑدہ ئی و سٹریٹجک پارت آن دا ریسہ طے مس ، ملکی زرگزران نا شونداری، پائیدار اقتصادی نمو، درآمد و برآمد آتیٹی ودکی و براہ راست زرکاری ءِ اتنگ کن حکومت داوڑنا گام گیج آتا ستاءِ کیک۔ وزیرخزانہ پارے کہ ایگزم بینک پاکستان اٹ برآمدی صنعت نا مون آ دننگ کن اسہ پوسکن ءُ بناسے ، داملک انا زرگزران و بینکاری کن ہم اہمیت تخک ہراڑآن پاکستان نا واپاری و مالیاتی پنجر ءِ پوسکن آ دور انا خواست و جہانی آب انا رداٹ جوڑ کننگ اٹ کمک رسینگک۔