قائد اعظم نا رغاموک و پاکستان نا آئین نا رداٹ اسہ وڑ حق دوئی ءِ، صدر مملکت نا کرسمس دود آن تران

اسلام آباد۔ 21 دسمبر (اے پی پی) صدر مملکت ڈاکٹر عارف علوی پاکستان تون اوار مچ آ دنیا ٹی امن و بین المذاہب ہم آہنگی کن پبی کوشست آتا گرج آ زور شاغسا پارینے کہ ملک اٹی مسیح تتون اوار غٹ اقلیت آتے اسلامی تعلیمات، قائد اعظم محمد علی جناح نا رغاموک و پاکستان نا آئین نا رداٹ اسہ وڑ حق دوئی ءِ۔ داخیال آتا درشانی ءِ او داڑے وزارت مذہبی امور و بین المذاہب ہم آہنگی نا کنڈآن ایوان صدر اٹی کرسمس نا بابت اڈ ہلوک دود آن تران کرسا کرے۔ دود اٹی خاتون اول بیگم ثمینہ علوی، نگران بنجائی وزیر مذہبی امور و بین المذاہب ہم آہنگی انیق احمد، اسلام آباد اٹی متعین درملکی سفارتکار و مسیحی برادری نا مذہبی پیشوا تتون اوار چندی مذہب آتیان تعلق تخوک آ مذہبی راہشونک بشخ ہلکر۔ صدر مملکت پارے کہ رسول اکرم صلی اللہ علیہ و آلہ وسلم و حضرت عیسیٰ علیہ السلام نا کلہو امن ءِ عام کننگ نا گرج ءِ۔ اومسیح برادری تے کرسمس نا مبارکبادی ترسا پارینے کہ کرسمس دا یات کننگ نادے ءِ کہ حضرت عیسیٰ علیہ السلام امن نا عظیم پیامبر ءِ۔ ڈاکٹر عارف علوی پارے کہ کرسمس نا دود اٹی بشخ ہلنگ کنکن شرفمندی نا سوب ءِ۔ اوپارےکہ اسہ مذہب اس ہم انسانیت آ ظلم ءِ اسُل سگپک، دنیا غان ظلم ءِ چٹفنگ کن غٹ تینا کڑد ءِ ادا کیر۔ اوداہیت آ است ہسونی نا درشانی ءِ کرے کہ شون ہلوک قومک دنیا ٹی مروک آ ظلم آ چپ ءُ، غزہ ٹی مسیت و گرجاگھر تے ہم شست کننگ انگ ءِ، اودنیا غا زور شاغا کہ او ظلم، تصادم و بیدادی آن بچر و رواداری ءِ مون آ دیر۔ صدر مملکت پارے کہ دنیا ظلم وستم ءِ خننگ ءِ۔ غزہ و ایلو علاقہ غاتیٹی کودک شاری تے کشت وخون نا شست کننگ انگ ءِ، غزہ ٹی داتم اسکان زالبول و چناتتون اوار 19 ہزار بندغ شہید مسنو۔