تاشقند۔ 10 نومبر (اے پی پی) نگراں وزیراعظم انوارالحق کاکڑ پارے کہ بھارت نا بے چکاری آن پد ہم پاکستان تینا و ڈیہہ انا توانائی نا گرج آتے پورو کننگ کن تاپی گیس پیپ لین ڈٹ ءِ پورو کننگ کن سنبرینگوک ءِ، پاک بھارت تعلقداری تے معمول آ اتنگ کن کشمیر نا ویل ءِ اقوام متحدہ نا قرارداد آتا رداٹ ایسر کروئی مریک، غزہ ٹی مروک آ بھسکاری نا اثرآک ڈیہہ و اوکان پیشن اسکان تالانی نا نتیجہ غاتیان خبڑدار کرسا ہموڑے دمدستی جنگ بندی آ زور شاغانے ، اوپارے کہ تاشقند اٹی اقتصادی کمکار تنظیم نا 16 می سروکی دیوان نا وخت آ خبررساں ادارہ اناطولیہ ءِ خصوصی انٹریو ٹی اوپارے کہ ڈیہہ اٹی اسہ کھلا انسانی المیہ اس نظر بننگ ءِ۔و اونااثر نئے بیرہ ڈیہہ اٹی بلکن شاید ڈیہہ آن پیشن ہم تمک۔ اوغزہ ٹی جنگ انا ’’دمدستی‘‘ چٹفنگ آ زور شاغا، وزیراعظم خور، دوائی و ایلو المی آ گڑاتا بے سلنگ آن فراوانی کن انسانی راہداری نا قیام نا خواست ہم کرینے۔ اوپارے کہ پاکستان اسلامی کمکار تنظیم (او آئی سی ) نا بروک آ خصوصی دیوان اٹی بشخ ہلنگ نا چاری ءِ، اوآئی سی غزہ نا حالیت آتیا بایدے سجفے ، و اجتماعی ردعمل ظاہر کے، بیدس دستاویزات رہینگوک اوغان باہوٹ آتے پدی گدریفنگ نا پاکستان نا گام انا دفاع ءِ کرسا اوپارے کہ اونا ملک دافیصلہ ءِ زرس ہرے آ کرے، ولے نن سیم آ ہن و بر ءِ منظم کننگ کن بھاز زیات سنبرینگوک اُن۔ اوپارے کہ دنیا ٹی اسہ جاگہ اس ہم و ملک اسے نا کنڈآن غیرکانودی امیگریشن نا ات بڈی ءِ کننگتنے تو پاکستان تون خصوصی وڑاٹ داسلوک ءِ انت اکن کننگک کہ او غیردستاویزی اوغان شاری تتون بصورت دیگر سلوک کے۔ ہر ملک ایلو ملک آتا شاری تا منظم ہن وبرخواہک۔ مریس مد اٹی دا اوغان شاری و پاکستانی تا گچین فائدہ ٹی مریک کہ ایلو دنیاغانبار معمول نارداٹ منظم ہن و برمرے، ترکیہ و پاکستان نا نیام اٹ ہڑتوم آکنڈآتا تعلقداری ءِ شاندار گوندسا اوترکی و پاکستان نا نیام اٹ رابطہ و کمکاری ءِ ودفنگ آ زور شاغا۔ اوپارے کہ واپار ، کشت وکشار و دفاع کون آ بھاز انگا بشخ آک ءُ، ہرافتے ٹی تعلقداری تے گچین کننگ مریک۔ و گڑاس راہداری تے شون ترسا ترکیہ، پاکستان و ایران نا نیام ا ٹ رابطہ ءِ بحال کننگ مریک، ہرا غٹ قوم و مچ آ ڈیہہ ءِ بھاز انگا وارخواہی فراوان کیک۔ ترکمانستان ، اوغانستان، پاکستان و انڈیا ،(تاپی) ہرا ارب آ ڈالر نا توانائی کوریڈور ءِ، نا بارواٹی وزیراعظم پارے کہ بھارت ناکنڈآن مبینہ عدم دلچسپی آن پد ہم پاکستان نا چکار بھلو وخت اسے آن زیرالتواء ڈٹ آن فائدہ دوئی کننگ آٹے۔ تاپی نا بابت ترکمانستان، اوغانستان وپاکستان نا کنڈآن بھلو جوش و خروش اس خننگک۔ دا بھارتی زرگزران ءِ توانائی نا اڑزان و پائیدار فراوانی ءِ پک کننگ کیک۔ ولے اگہ او دا مچ آ بست وبند آتا فائدہ غان پیشن مننگ ءِ گچین کیک تواوداسہ ہم داوڑکننگ کیک۔ ولے کناخیال ءِ کہ بھارت تون یا اوڑان بیدس، ترکمانستان نا گیس ءِ داڈیہہ انا زرگزرانی فائدہ کن کاریم اٹ اتنگ مریک، و نن داہدف ءِ دوئی کننگ کن بھاز چکار تخانن۔ 7 ارب ڈالر نا دا ڈٹ انا مسخت ترکمانستان نا گکنیش و محلقہ گیس فیلڈ آتیان قدرتی گیس اوغانستان، پاکستان و بھارت اسکان سرکننگ ءِ۔ ایشیائی شونداری بینک دا ڈٹ اٹ آسودہی و کمک فراوان کننگ ءِ، ہراٹی 56 انچ قطر نا 1،680 کلومیٹر(1،044میل) پیپ لین تالان کننگ نا سلاہ ءِ ہرانا ڈیزین نا گنجائش 33 ارب مکعب میٹر سالانہ قدرتی گیس ترکمانستان آن پاکستان نا کسر پاک بھارت سیم اسکان سرکننگک۔
