اسلام آباد۔ 03 نومبر (اے پی پی) سینیٹ اٹی قائد ایوان سینیٹر اسحاق ڈار پارینے کہ مشترکہ مفادات کونسل آن مردم شماری نا منظوری آن پد پوسکن آ حلقہ بندی آئینی خواست ءِ ، آئین نا رداٹ 90 دے اٹی الیکشن مرے ولے آئین نا ایلو شق آتے ہم مون آ بایدے تخنگے، الیکشن کمیشن گچین کاری تیکن 54 ارب روپئی خوائسکہ، 46 ارب روپئی آ امنامس، ننا مخالف واکدارآک خوائسرہ کہ پاکستان خواتہ مرے، لس گچین کاریک انصاف و شفاف مریر غٹ اکن لیول پلیئنگ فیلڈ اس بایدے مرے، گچین کاری تا انت کہ نتیجہ اس برے اودےغٹ ءِ ایمانداری اٹ امنا کروئی مرے۔ جمعہ نا دے آ سینیٹ نا دیوان اٹی گپ وتران کرسا قائد ایوان سینیٹر اسحاق ڈار پارے کہ ہراتم اسہ وار مشترکہ مفادات کونسل مردم شماری نا منظوری ءِ ایتے تو ولدا الیکشن کمیشن ءِ حلقہ بندی کروئی تمک، 2 اگست آ مشترکہ مفادات کونسل مردم شماری ناحساب وکتاب نا منظوری ءِ تسوسس، اوپارے کہ 90 دے اٹی گچین کاری تا ہیت ءِ داڑے کننگانے ولے داڑکن مالیاتی نظم و ضبط ءِ ہم ہروئی مریک، اگہ اسمبلیک تحلیل مریرہ تو 90 دے اٹی گچین کاری بایدے مرے، دااسہ آئینی خواست اسے ولے داڑتون اوار اوار آئین نا ایلو شق آک ہم اریر۔ اوفتے ہم بایدے مون آ تخنگے۔ اوپارے کہ پنجاب و خیبرپختونخوا ٹی گچین کاری تے اول کرفنگ کن ودکی فنڈآتا گرج ئس، نن آئی ایم ایف نا پروگرام اٹی ہم چلینگ انگ اُن اودےہم مون آ تخوئی مریک۔ کنا کوشست ئس کہ 2023-24نا بجٹ اٹ الیکشن کمیشن کن فنڈ آتا فراوانی ءِ پک کننگا، نن الیکشن کمیشن تون ہراگڑاتیا امنا کریسن اوفتے پورو کننگ المی ئس۔ اوپارے کہ آئی ایم ایف تون پروگرام ءِ طے کرسا پدی مرین و زرگزران 24 می نمبر آن 47 می نمبر آ کائے و دا پاننگے کہ پاکستان خواتہ مرے و سری لنکا جوڑ مرے تو ننا حکومت جوڑ مس تو ہندا ہمووخت انا اپوزیشن نا خیالات آک ئسر ، حکومت و اپوزیشن ملکی فائدہ غاتیکن افہا م و تفہیم کن بایدے مون آ بریر، ننا مخالف واکدار آک خوائسرہ کہ پاکستان خواتہ مرے۔
