اسلام آباد۔ 26مئی (اے پی پی) بنجائی وزیر خزانہ اسحاق ڈار پارینے کہ اپوزیشن بایدے معیشت آ سیاست کپ، ننے میثاق ءمعیشت آ یکجا مننگ نا گرج ئِ۔ اینو پاکستان نا شرح نمو بڑزانگا کہول آٹی ئِ۔ 2013ءٹی پاکستان نا دیوالیہ مننگ نا ہیت کننگاکہ وخت اس کہ اینو 2030ءاسکان پاکستان ئِ دنیا نا 20 بھلا معیشت آتیٹی اوار مننگ نا نوید بنفنگ انگ ئِ۔ سینیٹ اٹی اپوزیشن نا برانز آن اودے سخت مایوسی مسنے۔ جمعہ نا دے ایوان بالا ٹی اپوزیشن نا برانز آ خیال آتا درشانی ئِ کرسا اوپارے کہ سینیٹ نا داوڑنا چاگڑد ئِ خنسا اودے سخت ڈکھ مسنے۔ مہالو سینیٹ اٹی وخت اس ہم دُن متوکہ۔ دا کنا یا مسلم لیگ (ن) نا آخا ، پاکستان نا بجٹ ئِ ، انت اپوزیشن دا سوب آن برانز کننگ ئِ کہ اینو ننا شرح نمو بڑزانگا کہول آٹی ئِ و پاکستان ئِ 2030ءٹی دنیا نا 20بھلا معیشت آتیٹی اوار مننگ نا نوید بنفنگ انگ ئِ۔ انت اپوزیشن ئِ ہمووخت یات اف ہراتم 2013ءنا گچین کاری نا وخت پاکستان نابارواٹی پاننگاکہ کہ او دیوالیہ اس مننگ والائِ۔ ساڑی حکومت ریکارڈ 1001ارب روپئی نا شونداری بجٹ اس تسنے و کشاری بشخ اکن ہم 1001 ارب روپئی جتا کرینے۔ اپوزیشن نا برانز حیرانی اسے۔ نن تو دُن کتونہ بلکن بجٹ آ مدبرانہ وڑاٹ تینا رائے نا درشانی ئِ کرینہ۔ اوپارے کہ ننے میثاق ءمعیشت آ یکجا مروئی تمک۔ معیشت آ بایدے سیاست مف۔ انت نمے دا یات اف کہ اسہ ٹرانزیکشن آ ملک ئِ 100 ارب روپئی نا نسخان مسکہ۔ ملک ئِ ننے اواری اٹ مون آ دروئی ئِ وہمو ہند اسکان اودے سرکروئی ئِ ہرانا تغ ئِ قائد اعظم و علامہ اقبال خناسر۔ اوپارے کہ نن ہم خوانہ کہ فاٹا وگلگت بلتستان کن فنڈزاٹی ودکی کننگے ولے بنجا ئی حکومت تون وسیلہ کم ئِ۔ نن بایدے اواری اٹ علاقہ غاتا شونداری کن کاریم کین۔ مشترکہ مفادات کونسل اٹی ہم داہیت مسنے۔ مہالو نا وار ہم این ایف سی ایوارڈ اٹی بنجائی حکومت تینا بشخ ئِ کم کرسا صوبہ غاتا فنڈ اٹی ودکی کرے۔
