اسلام آباد۔ 21مئی (اے پی پی) وزیر خزانہ سینیٹر محمد اسحاق ڈار تون پاکستان ڈیری ایسوسی ایشن نا ڈل یک شنبے نا دے داڑے وزارت خزانہ ٹی اوڑدہی کرینے۔ ڈل وزیر خزانہ ئِ پاکستان نا ڈیری نا بشخ انا ساڑی آ حالیت آتا بارواٹی بریفنگ تس۔ اوبجٹ تجاویز نا بابت ہم وزیر خزانہ تون خیال آتا درشانی ئِ کریر۔ بنجائی وزیر شعبہ نا بارواٹی بریفنگ و بجٹ تجاویز نا ستائِ کرے و پارے کہ ایسوسی ایشن نا تجاویز آ بجٹ نا تیاری نا مرحلہ ٹی سجفنگک۔ وزیر خزانہ مستی پارے کہ بجٹ نا تیاری نا چرجوئی ٹی غٹ شریدار آتیان سرجم تجاویز بٹنگ انگانے و بجٹ نا تیاری ٹی اوفتیا سجفنگانے ہم ۔ اوڈیری سیکٹر نا ڈل آ زور شاغا کہ پاکستان اٹی صارف آتے جہانی معیار نا رداٹ پال و ایلو مصنوعات آتا فراوانی ئِ المی جوڑ کننگے ہراٹی حفظان جان جوڑی نا اصول آتے ہم مون آ تخنگے۔ اوشعبہ ٹی کاریم کروک آ کمپنی تیا زور شاغا کہ ڈیری نا شعبہ تون گنڈوک بندغ آتا شرحالی آ چکار تخر ، داکان بیدس پال انا پیداوار ئِ ودفنگ کن ہم جامع گام گیج کیر۔ وزیر خزانہ پارے کہ حکومت نا کشاری پیکج آن کشاری بشخ انا کارکڑد اٹی نمان ودکی مسنے۔ اوپارے کہ اینخو مالی سال 2016-17ءٹی شعبہ نا شرح شونداری 3.46درسد مسنے ہرا گدرینگوک آ سال آن بھاز زیات ئِ۔ اسحاق ڈار مستی پارے کہ رمضان پیکج نا رداٹ ایلو 19گڑاتے تون اوار اوار پال آہم سبسڈی تننگ انگ ئِ تانکہ رمضان اٹی الس ئِ ریلیف فراوان کننگ مرے۔ وزیر خزانہ تون اوڑدہی کروک آ ڈیری ایسوسی ایشن نا ڈل اٹی نیسلے، اینگرفوڈز، شکر گنج ملز، فوجی فوڈز، پیکجز لمیٹڈ و ایور فریش فارم نا نمائندہ غاک ہم اوار ئسر۔ وخت اس کہ داوخت آ وزیراعظم نا خصوصی کمکار ہارون اختر، سیکرٹری خزانہ، ای اے ڈی ، چیئرمین ایف بی آر و ایلو وزارت آتا بڑزکو کمامدارآک ہم ساڑی ئسر۔
