ریاض۔ 21مئی (اے پی پی) وزیراعظم محمد نواز شریف یک شنبے نا دے اولیکو امریکہ عرب اسلامی سروکی کانفرنس اٹی شرکت کن ہراتم شاہ عبدالعزیز کانفرنس سینٹر آ سرمس تو سعودی عرب نا فرمان روا و خادم الحرمین الشریفین شاہ سلمان بن عبدالعزیز اودے گرم جوشی اٹ خیرمقدم کرے۔ وزیراعظم شاہ سلمان بن عبدالعزیز السعود نا سلہ غا دیوان اٹی شرکت کننگ ئِ۔ سلاہکار خارجہ سرتاج عزیز و خاتون اول بیگم کلثوم نواز ہم اوڑتو ن اوار ئُ۔ امریکہ عرب اسلامی کانفرنس اٹی سعودی عرب نا فرمانرواشاہ سلمان بن عبدالعزیز و امریکہ نا صدر ڈونلڈ ٹرمپ آن بیدس 55ملک آتا سروکِ حکومت و ریاست ئِ شرکت کننگ نا سلہ تننگانے۔ ریاض اٹی مروک آ دا کانفرنس نا کمک اٹ شریک ملک آتے دنیا غان دہشت گردی و انتہاپسندی نا چٹفنگ کن چندی وڑوڈول آتیا سجفنگ نا موقع ملک۔ اومیت ئِ کہ دا کانفرنس نا کمک اٹ دہشت گردی ئِ خاص ئُ مذہب ، دودوربیدہ ، تہذیب یا علاقہ سے تون گنڈنگ نا رجحان ئِ ختم کننگ مرے۔ کانفرنس آن تران اٹی وزیراعظم محمد نواز شریف اسلام نا امن، سگ و سیوت نا کلہو ئِ تالان کیک۔ وزیراعظم کانفرنس آن تران اٹی ڈیہہ ٹی دہشت گردی و انتہاءپسندی نا لعنت ئِ شکست تننگ کن پاکستان نا قربانی و بھرم تے مون آ تخک۔ تینا دورہ ٹی وزیراعظم دہشت گردی نا برخلاف جہانی بنجانا بنائی دود اٹی ہم شریک مریک ہرا انتہاپسندی نا چٹفنگ کن سعودی عرب نا حکومت نا اہم ئُ گام اسے۔
