اسلام آباد۔ 19 اپریل (اے پی پی) وزیراعظم محمد شہباز شریف نا کماشی ٹی بنجائی حکومت ملک انا ورنا تا بھلو کچ اسے واکدار کننگ کن بھلو کچ اسے آ گام گیج آتیا عمل کننگ ءِ ہرانا مسخت ورناتے چندی بشخ آتیٹی تینا لائخی تے نشان تننگ و ملک انا آخبت نا جوڑ کننگ کن لائخی تے کاریم اٹ اتنگ نا وارخواہی فراوان کننگ ءِ، وزیراعظم نا وژن نا رداٹ بنجائی حکومت ورناچین ءِ واکدار کننگ و اوفتے پوسکن آ تعلیم آن آراستہ کننگ کن 15 میگاپروگرام تا نقاب کشائی ءِ کرسا وزیراعظم یوتھ ڈویلپمنٹ انیشیٹیوز نا بناءِ کریسس۔ اقوام متحدہ نا شونداری پروگرام (یواین ڈی پی) نا رپورٹ نا رداٹ دا وخت آ ملک انا 64 درسد بندغ آتا وئی 30 سال آن کم ءِ و 29 درسد پاکستانی تا وئیک 15 آن 29 سال انا نیام اٹ ءُ۔ پاکستان اٹی داسہ مہالو آن زیات ورناءُ، و کم از کم 2050 اسکان داٹی ودکی مننگ نا پیش گوئی کننگانے۔ دا اہم عنصر ءِ مون آتخسا ، بنجائی حکومت ورناتے واکدار کننگ کن 150 ارب روپئی نا وزیراعظم یوتھ ڈویلپمنٹ پیکج نا بناءِ کرے۔ دا پروگرام تیٹی واکدار ورنا انٹرن شپ پروگرام، وزیراعظم یوتھ لیپ ٹاپ پروگرام، بلوچستان و مسکوہی فاٹا نا طالب علم آتیکن 5000 وظیفہ، نیشنل ٹاپ ٹیلنٹ سکالر شپ پروگرام، سیرت چیئرز نا جوڑ کننگ، پاکستان نا غٹ آن کم شون ہلوک ضلع غاتیٹی سرکاری یونیورسٹی تا ذیلی کیمپس آتا جوڑ کننگ، سکلز ٹریننگ پروگرام، ینگ ڈویلپمنٹ فیلو شپ پروگرام، سینٹرز آف ایکسیلینس ، پاکستان انوویشن فنڈینگ ڈویلپمنٹ لیڈر ایوارڈ، پاکستان نا 20 نیزگار آ ضلع غاتا شونداری کن خصوصی شونداری اسکیم ، مچ آ پاکستان اٹی ینگ پیس اینڈ ڈویلپمنٹ کورس و 250 منی سپورٹس کمپلیکس نا جوڑ کننگ اوار ءِ۔ ہندا وڑ بھلو کچ اسے آ ورناتپہ ءِ فعال کننگ کن وزیراعظم نا کنڈآن پی ایم یوتھ بزنس و ایگری لون اسکیم ہم بناءِ کننگا ہرانا کمک اٹ ورناتے چندی کاروبار و کشت وکشار نا گام گیج آتا کمک اٹ تینا روزی ءِ کٹنگ نا وارخواہی فراوان کننگانے۔ دا گام انا مسخت 15 کمرشل، اسلامی و ایس ایم ای بینک آتا کمک اٹ آسان شڑت آتیا و کم شرح سود آ کاروباری وام تا فراوانی نا کمک اٹ ورناتیٹی انٹرپرینیورشپ ءِ مون آ دننگ ءِ۔ غٹ پاکستانی شاری ہرافتا وئی 21آن 45 سال انا نیام اٹی ءُ، کاروباری لائخی تخوک بندغ وام اکن درخواست تننگ نا اہل ءُ۔ اسکیم نا رداٹ تروک آوام تے مسہ درجہ غاتیٹی بشخنگانے۔ 21 و 45 سال انا وئی نا مخلوق دا اسکیم تا رداٹ 75 لکھ روپئی اسکان نا وام تا آسراتی دوئی کننگ کیرہ۔ آئی ٹی و ایم کامرس نا کاروبار کن ، کم وئی نا حد 18 سال ءِ۔ چنکاکاروبار وام تا کمک اٹ مائیکرو فنانسنگ ملک انا ورناتیٹی ملازمت نا پٹنگ نا جاگہ غا روزگار نا وارخواہی ودی کننگ نا عمل ءِ مون آ دیک۔ وزیراعظم محمد شہباز شریف بنائی دود اٹی ریمارکس تسوسس کہ مسکوہی وزیراعظم نواز شریف نا دور اٹی ہم بنجائی کہول آ دا پروگرام تا بناءِ کننگاسس و 54000 ورناتے 75 ارب روپئی نا وام تننگاسس ہرافتیان نئے بیرہ ورناتے فائدہ مس بلکن داڑان ملک ءِ ہم فائدہ مس و ملک انا زرگزران ءِ مون آ دننگ ملا۔ ملک انا کم وود 64 درسد آبادی ورناتیا تالان ءُ و دا گام آن اوفتے براہ راست فائدہ رسینگا۔ کشاری وام تا ودکی آن خلقی ورناتے کشار گری نا پوسکنی ٹی کمک ملنگ ءِ ہراٹی مشینی کشارگری، کشاری ویلیو چینز نا تخلیق و کشارگری نا ازباب آتا سولرائزیشن اوار ءُ تانکہ پاکستان کون آ موسمیاتی چیلنج تون مون تروک ملک اٹی توانائی نا وسیلہ غاتا زیات پائیدار بست وبند ءِ کننگ مرے۔ وزیراعظم شہبازشریف وام اسکیم تا مسخت ورناتے خودانحصار کننگ گونداسس۔ مستین اٹ مسلم لیگ (ن) نا حکومت ورناتے 40 ارب روپئی نا وام فراوان کرے و دانا وصولی نا کچ 90 درسد ئسک۔ نواز شریف نا کماشی ٹی حکومت ورناتے 15 ارب روپئی نا لیپ ٹاپ جاری کرے، وزیراعظم اسکیم نا نقاب کشائی ءِ کرسا اونا ہم حوالہ ءِ تسوسس۔ باصلاحیت ورناک الس کن وزیراعظم نا کنڈآن بناکروک آ ’’ارٹ میکو موقع‘‘ انوویشن ہب‘‘ پروگرام ئسک۔ وزیراعظم نا وژن نا رداٹ جوڑ کروک انوویشن ہب غٹ اسٹیک ہولڈر خاص وڑاٹ ملک انا باصلاحیت ورناو افرادی قوت نا خیال آتے اوار کرسا ملک انا گرج آتون ہم گرنچ پالیسی سازی ٹی اہم ءُ کڑد اس ادا کیک۔ دا پوسکن آپروگرام ءِ ہرا ملکی و پیشن نا ملک پاکستانی تیان ماہرآتا مشورہ، ان پٹ و کمکاری نا دوئی کننگ کن بناکننگاسس۔ داوزیراعظم نا دا عزم انا ہم ڈیک ءِ ایتک کہ او ذاتی وڑاٹ پوسکن بناکروک آ انوویشن ہب ءِ مون آ دیک و حکومت غٹ وزارت آتیٹی باصلاحیت ورناتیکن خصوصی سیل اس جوڑ کیک تانکہ ورناتا قومی پالیسی سازی کن تینا اختراعی آئیڈیا تیا کاریم کننگ نا است بڈی ءِ کننگ مرے۔
