اسلام آباد۔ 19 اپریل (اے پی پی) بنجائی وزیر جان جوڑی عبدالقادر پٹیل پارینے کہ مشکل آ وخت اٹی ہم ننا چکار پولیو نا چٹفنگ آ مسنے۔ چیلنج آتیان پد ہم پولیو نا چٹفنگ کن سنبرینگوک اُن۔ داخیال آتا درشانی ءِ او چارشنبے نادے آ تینا اسہ بیان اسے ٹی کرے۔ وزیر جان جوڑی عبدالقادر پٹیل پارے کہ کیہی ضلع غاتیٹی جان جوڑی نا خذمت آتا بنداوی پنجر ءِ بھاز نسخان رسینگانے و ہزار آ مخلوق تینا اُرا و ذریعہ معاش آن محروم مسنو، ہراڑان 2022 نانوکاپ آن پد ننا راجی رکھ انا وڑوڈول آ بھاز دباؤ تمانے۔ نن داسہ ہم بحالی نا کاریم تیٹی لگوک اُن۔ ولے دا مشکل آ دورآن پد ہم پاکستان پولیو نا چٹفنگ آن تینا چکار ءِ اسہ کنڈ کتنے انتئے کہ پاکستان نا چناک مچ آ دنیا نا چناتیانبار اسہ جان جوڑ زنداسے نا حقدار ءُ۔ وزیر جان جوڑی مستی پارے کہ جہانی برادری نا فراخدلانہ کمکاری نا منت واریءِ ہرفنہ، پاکستان پولیو دین انا برخلاف جارحانہ وڑاٹ مون تننگ ءِ۔ ڈونرآتیان سرسہب ویکسین مہم آتیکن فنڈنگ نا کمکاری المی ءِ، تانکہ نن سرسہبی اٹ رکھی ویکسین نا مہم آتے چلیفنگ کین، و نن تینا درکار ہدف ءِ دوئی کننگ کین ، نن آخیریکو ایلو ماندہ جغرافیائی علاقہ غاتیان رکھی ویکسین آن دین انا چٹفنگ کن فعال وڑاٹ کاریم کننگ اُن۔
