لاہور۔ 19اپریل (اے پی پی ) لاہور ہائی کورٹ آنسوگیس انا برخلاف درخواست ءِ بنجائی وزارت داخلہ نا بیان آن پد سرترسا معیاد آن زیات آنسو گیس انا کاریم اٹ اتنگ آن تورے۔ عدالت ریمارکس تس اگہ خلاف ورزی مس تو توہین عدالت اٹ آئی جی پنجاب ءِ بٹنگک۔ لاہور ہائی کورٹ نا جسٹس شاہد کریم چارشنبے نادے آ کیس انا سماعت ءِ کرے۔ درخواست گزار اظہر صدیق دلیل تس و موقف اختیار کرے کہ آئین پاکستان ہر شاری ءِ پرامن برانز ناحق ایتک، تدوک آ سال 25 مئی آ پی ٹی آئی لانگ مارچ انا پرامن بشخ ہلوک آتے بیدادی نا شست کننگا۔ پولیس لانگ مارچ انا بشخ ہلوک آتیا آنسو گیس ءِ بے تک کاریم اٹ ایس۔ خواست ءِ عدالت زموار آتا برخلاف کارروائی ناپرمان ایتے۔ بنجائی وزارت داخلہ نا کنڈآن ایڈیشنل اٹارنی جنرل اسد باجوہ عدالت اٹ ورندی جمع کرفے۔ اوپارے کہ ننا اسٹاک اٹی معیاد آن زیات آنسوگیس اف و نئے چلیفنگا۔ عدالت پارے کہ ڈپٹی اٹارنی جنرل نا بیان ءِ مون آ تخسا درخواست ءِ سرتننگ انگ ءِ۔ عدالت آنسوگیس انا برخلاف درخواست ءِ سرترسا معیاد آن زیات آنسو گیس انا کاریم اٹ اتنگ آن تورے۔
